Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hoe die keyser Frederick van Roome, vader vanden Roomschen coninc Maximilianus, quam voor Ghendt te Euerghem ligghen, met een groot volck van wapenen.

[fol. CC.liiij.r]

[Den.xvij.sten dach van Meye]

ITem vp den.xvij.sten dach van Meye in tselue iaer, so quam den Keyser van Roome vader vanden Roomschen coninc, met sijnen volcke ligghen voor Ghendt te Euerghem, daermen sinte Christoffel versouct, ende was een mijle van ghendt, ende hadde met hem wel xi^m.vechtende mannen wel voorsien, ende lach daer wel.vi.weken lanc, ende sijn volck quam daghelicx schermutsen yeghens dye van Ghendt, ende vinghen tvolc daer si consten

[Den eersten en .vi.sten en vij.sten en viij.sten dach van Wedemaent]

¶ Item den eersten dach van Wedemaent soe was te Brugghe gheordonneirt vander wet vander seluer stede, te seyndene ter Sluys.ij^c. mannen, omme daer mede toe te siene, maer in die sluys te commene en gheschiede terstont niet, want als die van Brugghe quamen voorder sluys, die vander sluys ende tgarnisoen maecten een groot alaerme Maer ommer si en schoten niet, want sie waren van te voren gheaduerteirt dat wi van Brugghe commen souden, maer si en wisten niet wanneer. Maer eenege quaetwillende die binnen der sluys waren die seyden dat die Henewiers die vanden garnisoene waren, niet en wilden ghedooghen in gheender manieren, datmen ons van Brugghe in die sluys laten soude. Ende vp den.vi.sten dach van Wedemaent, soe liep tghemeente vander sluys in die wapene, ende was vp haerlieder processie dach, ende maecten een vergaderinghe vp beede die marcten wel voorsien ende ghewapent, ende daer ordonneirden si dat si alle dye Henewiers huyter stede smijten wilden, in dien si met goelicheden niet huytgaen en wilden, of niet sweeren en wilden met onsen natuerlicken prinche den graue Phelips si soudense alle doot slaen. Ende dye Henewiers dit siende, absenteirden hem lieden ende hilden hem verborghen. Ende als dye vander sluys saghen dat hem die Henewiers verborghen hilden, so seyden si waert sake dat dye van Brugghe Middelburcht niet of worpen en wilden, si wilden neutre sitten, ende huerlieder stede selue bewaren, ende dat doende souden ander aduijs nemen. Ende den.vij.sten dach vander seluer maent hadden alle die Henewiers orlof sonder die ghene dye eedt deden mer Phelips van Rauesteyn, huyter name vanden hertoghe Phelips onsen natuerlicken prinche. Ende den.viij.sten dach vander seluer maent, so quamen die ij^c.mannen als voren wedde in Brugge, ende hadden alsoo liggen loopen vanden eenen dorpe ten anderen, haddent die vianden gheweten si haddense wel alle gheuanghen of den hals of ghesteken, want si waren ghenouch sonder eeneghe ordonnancie, ende en hadden gheenen capiteyn die si ontsaghen, of daer si of hilden.