Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item naer alle nyeumaren]

[Den.xxiij.sten dach van Ougst]

Item naer alle nyeumaren, so was waer dat die coninc vanden Romeynen track naer Bieruliet met vele schepen,

omme een assault te gaen doen vp Biervliet, alsoot oock ghebuerde den.xxiij.sten dach van Ougst. Ende stormende vp die voorseyde stede van Bieruliet, so schoten die van Biervliet so seer dat si drie huen vanden coninck inden gront schoten, waer of al tvolck datter inne was verdranc, ende die coninc en conste aen Bieruliet niet ghedoen, maer moeste van daer vlien. Ende int wech trecken die van Biervliet hadden daer roeybaergien al ghereet liggende met sijnen ruyters, ende volchden hem lieden inden steert, so dat si vinghen.iij.huen vanden scepen vanden Roomschen coninc, al vul duytsche knechten, ende vele edele daer mede die si voerden binnen Biervliet als haerlieder gheuanghenen. Ende die coninck vanden Romeynen quam te Middelburch seer verstoort in Zeelant.

[Den.xxvi.sten dach van Ougst]

¶ Item voort vp den.xxvi.sten dach van Ougst parlementeirde mer phelips van Rauesteyn met mijn here van Meerwede ende Roxhorne, ende versochten den.xxvij.sten van Ougst aen mijnhere van Meerwede, dat hi Burburch ouer gheuen soude, metsgaders dat hi daer capiteyn of was. Ende die voorseyde heere van Meerwede en wildet niet ouer gheuen, ten ware datmen betalen soude sijne ghesellen van.iiij.maenden saults, diemen hem lieden verachtert was, maer wierdens emmer eens vp.ij.maenden, ende gauen so Burburch ouere inden handen van mer Phelips ende mijn here van Peenen Capiteyn van Brugge, ende het volc van wapenen trac ter stont ligghen voor Vuerne. Ende vp desen seluen dach so dedemen te Brugge een ghebot, dat nyement wie hy ware eeneghe letteren messyue soude seynden buyten der stede, hi en soudse al voren bringen te visenteirene die vander wet, ende dat omme dat neyement gheene tijdinghe nyeuwers seynden en soude hoer te Brugghe stonde of niet. Ende die eeneghe brieuen sonden sonder die wet die kennesse te doene, soude verbueren.xx.libra parezysen.