Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[fol. CC.lviij.v]

[Item naer desen so ghebuerdet dat dye van Middelburch in Zeelant]

[Den.xxviij.sten dach van Ougst]

Item naer desen so ghebuerdet dat dye van Middelburch in Zeelant, metsgaders den ontfanghere van Middelburch, ende een pylote ordonneirden te liggene voor tswarte gat met seker schepen, omme te nemene sommege fransoysen die met lakene gheladen waren, den.xxviij.sten dach van Ougst. Ende dit vernemende die ruyters vander sluys, trocken tseghen met roeybaergien, ende vondense buyten den swarten gate, ende seyden dat si Bortoenen waren, tot dat si al vast aen die huen waren, die seer wel ghestoffeirt waren van engienen, ende elcke hue hadde inne.xl.mannen wel voorsien, ende dese baerdgien namen een bortoens schip dat die selue huen gheconuoyiert souden hebben tot Middelburch ghepasseirt, maer si misten van hueren voortstelle, ende waren gheuoert ter Sluys binnen voor goeden pryse.

[Den.xxviij.sten en den laetsten dach van Ougst]

¶ den.xxviij.sten dach van Ougst, so conmunikierden die vander Nyeupoort, die van Dixmude, ende die van Vuerne te samen bi eenen valschen rade die si concludeirden, als dat si ouer commen souden met mijn here van Rauesteyn, omme dat theyr vp breken soude. Ende als al vpghebroken ware ende ghescheeden, so souden si den Roomschen coninc in laten met alle sijnder macht. Alsoot wel bleec den seluen dach als voren, dat als saen als mer Phelips ende dandere capiteynen vpghelicht waren ende gecommen tot vp een mijle naer Brugghe, so quammer haestelicken een bode achter hem lieden ghereden die die verraderye van hem lieden vernomen hadde, want hijt selue gesien hadde dat die vander Nyeupoort teekene deden den Coninck vanden Romeynen ende sijnen gheselscepe, die vp dye zee waren voor der Nyeupoort met.xviij.huen, ende met.ij.grote scepen met meerssen, ende si deden ooc der stede van Nyeupoort teekene, als dat si hem te sercourse quamen. Aldus dese bootschap ende kennesse hebbende mer Phelips van Rauesteyn, ontboot haestelicke alle sijne capiteynen gheleghen ontrent der Nyeupoort, ende den anderen, ghelijc int wout van Niepen, dat si van haerlieder stercte niet trecken en souden, want het vpstel vanden.iij.steden voornomt al valsche verraderye was. Ende ontboden haestelicken die van Duynkercke, Oostende ende die vander Sluys, als dat si alle hare roeybaergien ghereet souden maken, ende souden wesen byden fransche schepen vp dye zee, den laetsten dach van Ougst met alle den ruyters van orloghen die si vercrijghen consten. Ende in sghelijcx ontboot hi te Brugghe aen mijn heere van Spiers, als dat hy haestelicken soude vpsitten met alle sijne Ruyters ende ghesellen van orloghen die hi in Brugghe ghecrijghen conste, ende brijnghen met hem x.of.xij.waghenen met vitaelgie ende met foraegie om die peerden. Ende dat hi den seluen laetsten dach van Ougst hem soude vinden te Oostende des auents, daer hem verbeydende was vele volcx van wapenen, omme te weeren den Roomschen coninc huyten westlande, twelcke terstont also ghebuerde. Ene was ooc een ghebodt ghedaen te Brugghe, dat alle dye ghene dye haerlieder lij auentueren wilden ter beschermenesse van den lande van Vlaendren ende van onsen natuerlicken prinche, dat si hem vinden souden byden Capiteyn.

[Den.xxx.sten dach van Ougst en den.ij.sten dach van Septembre]

¶ Item den.xxx.sten dach van Ougst, twelc was sdaechs hier voren, soe warer wagens met vitaelgie die naer Ghendt voeren. Ende die vianden waren wel.lx.peerden vp bulscamp velt, die welcke namen ende vinghen.iij.vanden seluen waghens. Ende binnen dien auende souden ghecommen hebben die ghedeputeirde van Ghendt binnen Brugghe, maer si moesten wederkeeren, of si hadden al gheuanghen gheworden vanden seluen duytschen. Maer quamen den laetsten dach van Ougst ende vermaecten die wet den.ij.sten dach van Septembre. Ende vp den seluen dach quamen die van Dixmude huyte, omme in te nemene dye langhe brugghe met engienen, maer waren meest al doot ghesleghen ende gheuanghen, ende lietender al haer engienen, ende die reste en conste nauwe te Dixmude binnen gheraken, so rasch waren hem haer vianden vp den hals.