Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xvi.sten en den.xx.sten en den xxiij.sten dach van Septembre]

Item vp den.xvi.sten dach van Septembre, so was raet ghehouden van monseur descordes, ende van mer phelips van Rauesteyn, ende mijn here van peenen, ende veil meer andere heren binnen der stede van Ipre, ende sloten sulcken Raet als dat elc van hem lieden last nam bysondere, elc een quaertier te suuerene vanden bouuen die contrarie waren haren natuerlicken heere ende prinche. Te wetene mer Phelips van Rauesteyn te Bruessele ende in dat quaertier, ende mijn here van Peenen het Brugsche quaertier, ende monseur descordes het Ipersche ende twestersche quaertier. Ende dat si alle vp eenen dach souden doen assault, alsoot ghebuerde vp die ghene die hielden yeghen die.iij.leden slants, alst bleec, want men trac voor Middelburch in Vlaendren den.xx.sten dach van Septembre, ende wonnen die stede den.xxi.sten dach, ende bleuen daer liggende voor tcasteel want die vianden wildent houden. Ende die van ghendt quamender ooc voren met.v^c. mannen, ende ontrent.lx.peerden, ende brochten met hem lieden.vi.grote sticken engiens ende schoten vp tcasteel den.xxiij.sten dach van Septembre, ende die van Brugge haddender ooc.ij.grote engienen daer si mede schoten vp tvoorseyde casteel, ende schotender grote gaten inne, maer die van binnen den casteele en verschoten noch nyet. Ende binnen der tijt dat si dus voor casteel laghen, so trocken die van Nyeupoort huyte ende die van Dixmude, ende si verbarnden.ij prochyen, deen was Leke, ende dander Keyhem, welcke twee prochien waren berooft ende iammerlijc verdoruen. Ende si verbarnden Womere ende Eesene dye kercken, ende vele lieden daer inne, fransoysen ende andere sonder eeneghe ghenade of ontfaermen, ende verbarnden al dat si vonden.