[Item op den.xxv.sten en den den.xxiiij.sten dach van Septembre]
Item op den.xxv.sten dach van Septembre, so wan mijn here van Peenen ende mer Phelips van Rauesteyn tvoorseyde casteel van Middelburch, want vp den.xxiiij.sten dach was vp tcasteel een assault ghedaen in welc assault datter vele doot bleuen, ende dat quam van eender schote die die van ghendt schoten met een groot engien, daer met dier schote doot gheschoten was sonderlinghe een capiteyn vanden Schotten die op een leere stont om Tcasteel te beclemmene, ende meer andere met hem, twelc claghelic was. Ende dye vanden Damme hadden tcasteel eens ghewonnen, ende warer inne wel een half huere, maer hem lieden en quam gheen onderstant rasch ghenouch, so datser weder huyt ghesleghen worden ende moesten vlien, by den welcken sommeghe van die voorseyde vanden Damme verdroncken, wantmense nyet ghehelpen en conste.
Auteursrechtvrij