[Item vp den.xxv.sten en den den.xxvi.sten dach vander maent voorseyde]
Item vp den.xxv.sten dach vander maent voorseyde quamen ghedeputeirde huyten casteele bi mijn here van peenen, ende baden om gracie van haerlieder lijf, si souden hem het casteel ouer gheuen in sijnen handen met al datter binnen was, het welcke hem lieden mijn here van Peenen consenteirde haerlieder lijf, maer het goet nyet. Ende doe ghinghen die capiteynen int casteel, ende men loet al tgoet datter in was, ende ooc in die stede, vp den.xxvi.sten dach van Septembre, ende men broche al tgoet te Brugge, ende vp den seluen dach stack men tvier alomme in die stede ende ooc in tcasteel, so varre dat Middelburch al gheheel verbarrent ende te nieten ghedaen was, ende alle die bouuen diere vp waren die lietmen alle loopen, metsgaders dat hem lieden haerlieder lijf ghegeuen was. Ende ons volc van Brugge quam den seluen dach thuys met die van ghent ende met al hueren engienen, ende dordonnancie was datmen terstont soude ghetrocken hebben voor Dixmude, maer het bleef also staende.
Auteursrechtvrij