Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hoe ioncfrau Margriete ghebrocht wart van die Duwagiereghe met schoonen state in Brabant

Hoe ioncfrau Margriete ghebrocht wart van die Duwagiereghe met schoonen state in Brabant, binnen der stede van Mechelen by haren broedere den edelen Hertoghe Phelips, dye haere seer vriendelic ontfinck, met alle die heeren vander oordene ende metten heeren vander wet, ende wart vander gheheelder ghemeynte triumphelijc ontfanghen met grooter blijschap.

[fol. CC.lxxix.r]

ALs dan die Fransoysen oorlof ghenomen hadden aen die voorseyde Ioncfrouwe Margriete, so brochtse dye Duwagiereghe met haren state van daer in Brabant, ende sonderlinghe te Mechelen, daer haer broeder den Hertoghe Phelips teghen haer track buyten der poorten, daer si beede beeteden van hueren peerden, ende willecomden malcanderen seer vriendelijcken, ende ghinghen een langhe poose wandelende tsamen Ende corts daer naer was haer ghebrocht eene schone witte tellenaer, om dat si daer vp sitten soude, ende commen alsoo in dye stede, maer sie begeerde achter hueren broeder den hertoghe Phelips te rijdene, twelcke alsoo gheschiede, ende reden alsoo tsamen binnen der stede van Mechelen, daer groote triumphe om huer ghedaen was ende was vanden heren vander oordene ende vander wet vander stede seer eerlijck ontfanghen.xxij.in Wedemaent Anno.xciij Ende corts daer naer trocken si Tantwerpen daer si ooc eerlick ontfanghen waren, ende was in die maent van Ougst Anno xciij.

[Den.ij.sten dach van Septembre en Vp den.xij.sten dach van Septembre en den.xxix.sten in Maerte Anno.xciij]

¶ Item den.ij.sten dach van Septembre was te Brugghe die wet vermaect, ende waren doe Burchmeesters Ian van Nyeuwenhoue.f.Claeys, ende Michiel van Temseke

¶ Vp den.xij.sten dach van Septembre, so was te Brugghe gheboden dat alle mannen ende vrauwen wel mochten reysen Tantwerpen in die marct, twelck men in drye iaren niet ghedaen en hadde.

¶ Item den.xxix.sten in Maerte Anno.xciij. so ouerleedt meester Gillis die baerdemakere Suffragaen van Doornicke, binnen

[fol. CC.lxxix.v]

der stede van Rijssele, daer hy ghetrocken was om oordene te gheuene, ende was ghebrocht vp den paessche dach doot ligghende in eenen waghene met sijn wapene bouen vp tlijck ten Cellebroerkins, ende tsanderdaechs van daer ghedreghen met processien, daer vele prelaten mede ghinghen, ende alle die doctueren vanden vier oordenen, ende voor tlijc drouchmen sijn crootse, ende achtere sijnen mijtre, ende met.xij.toortsen ende vier stallichten met datter toebehoort. Ende lach metten blooten aensichte, ende achter tlijck ghinghen die vrienden ende maghen, ende daer naer dye wet ende vele andere notabele, ende Dekens ende vinders vanden ambochten. Ende men luyde in allen kercken daer tlijc leedt, ende was also ghedregen van vier broeders al ghegheerutten Freren, ende daer begrauen, daermen tsanderdaechs sijn huytuaert seer solempnelick dede.