Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Ontrent desen tijde heeft Philibeert hertoghe van Sauoyen getrout vrauwe Margriete des Eertshertoochs suster]

Ontrent desen tijde heeft Philibeert hertoghe van Sauoyen getrout vrauwe Margriete des Eertshertoochs suster, ende dede haer incomste te Geueuren in die maent van December, ende es al daer bedreuen grote triumphe, welcke vrauwe Margriete byden Abt van Bertijn in Sauoyen ghebracht was met schoone compaingnie van volcke.

¶ Item ten tijde vander absencien vanden voorseyde Eertshertoge ende eertshertoghinne es Brabant, Vlaendren, Henegauwe, Artoys, Hollant ende Zeelant, in groten paeyse minne ende accoorde gheregeert byden Graue van Nassouwe, wesende generael van alle den lande, ter groter weluaert vanden lande, ende sonder twijfel tes schade datmen sulcke heerlicke ende duechdelicke personagien verliest, want hy corts daer naer sterf, hoe wel sijn leuen den lande noch wel ghedient soude hebben.

¶ Item ontrent desen tijde steruen twee gheestelijcke persoonen, die princepaelste die by den Eertshertoge waren in groter reuerencien ghehouden, te weten die eerweerdege vadere Fransoys van Busleid bisscop van Bisanson, die welcke doen begift was met eenen cardinaels hoet, ende starf in Spaengien. Ten seluen tijde ooc sterf dye eerweerdeghe vader Henrick van Berghen bisscop van Camerijc, die welcke een goet duechdelic ende rechtueerdich bisschop was te Camerijcke, want hy orlof hadde ghehadt vanden Eertshertoghe om thuys te reysene.