Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hoe dye Eertshertoghe Phelips van Oostenrijck orlof ghenomen heeft aen den coninc van Spaengien]

Hoe dye Eertshertoghe Phelips van Oostenrijck orlof ghenomen heeft aen den coninc van Spaengien, ende waer omme ende huyt wat saken hi weder duer Vranckerijcke ghetogen es, ende van vele diueersche vreemde saken na dien ghesciet, so in duytsche lant, ende vander orloghe van Ghelre, ende andere incidenten.

¶ Dat.lxxij.Capittel.

[fol. CC.xciiij.v]

OVermidts dat die Eertshertoghinne gheleghen was van haren tweesten sone, ende noch debile was om te reysen, so es si ghebleuen in Spaengien, ende heeft die Eertshertoghe hem met sijnen edelen toeghemaect, om weder omme te reysene naer Vlaendren ende sijnen nederlanden, ende es met reuerencien ghescheyden vanden coninck ende coninghinne ende alle den lande van Spaengien, ende voorts ghereyst naer Vranckerijcke, om metten coninck van Vranckerijcke te communicerene, aengaende der questien ende different datter was tusschen den coninck Fernant van Spaengien ende Arragon, ende den coninc van Vranckerijcke, hoe wel nochtans dat duerende desen tijt, die Fransoysen byden Spaengiaerden groote schade hadden, ende werden te Napels versleghen vele edele mannen, te wetene die hertoghe van Nemours, ende andere, ende was capiteyn vanden Spaengiaerden Consalue Fernant die de voorseyde fransoysen niet alleene wt Napels, maer ooc huyt tconincrijcke van Sicilien verdreuen heeft, ghelijck hier af naer blijcken sal.

¶ Item int voorseyde iaer heeft heer Phelips heere van Rauesteyn beleeget dye stadt van Mithelenen, gheleghen in Griecklant, ende hadden die Venecianen gheloeft hem met sinen volcke assistencie te doene, dwelck hem ghefaelgiert es, so dat hi met sijnen volcke van wapenen ende midts onweder ende tempeeste vander zee, es te rugghe ghetoghen ende ghecommen te Roomen, daer hem die Paeus tbeste ghedaen heeft, want sijn volc al verarmt was, ende storuen van nootdorfte.

¶ Item inden seluen tijde die wijle die coninc van Vranckerijcke es gheweest te Lyons, sijn daer bi hem ghecommen die voorseyde Philibeert hertoghe van Sauoyen ende vrauwe Margriete sijn hertoghinne.