Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hoe die Eertshertoghe] van Oostenrijcke Phelips, Hertoghe van Bourgoengien, van Brabant etc.]

Hoe die Eertshertoghe van Oostenrijcke Phelips, Hertoghe van Bourgoengien, van Brabant etc. ontseyt heeft Kaerle van Egmont den Hertoghe van Ghelre, ende hoe hy met groter macht van volcke ghereyst es nae dlant van Ghelre, om die steden in te nemene.

[fol. CC.xcv.v]

ITem int selue Iaer es Kaerle van Egmont ontseyt gheweest vanden Eertshertoge Phelips van Oostenrijck, ende men heeft grote preparementen ghemaeckt omme te conquesteren dlant van Ghelre, dwelck den Eertshertoghe toebehoorde, ende heeftmen ooc grote ghereetschape ghemaect van artelrien, engienen ende wapenen, dienende totter oorloghen, ende es te dienste vanden Eertshertoghe ghecommen die here van Vergier Maerschalc van Bourgoengien, met veel mannen van wapenen te peerde, ende dye edele van Vlaendren hebben hem heerlic vpgheset, metten edelen van Brabandt, Henegouwe, ende Artoys, ende es met vele volcx te voete ende te peerde ghereyst na den lande van Ghelre. Maer en heeft die hertoghe van Ghelre te velde niet derren commen, ende sijn in handen vanden Eertshertoghe ghecommen seker steden ende sloten vanden lande van Ghelre, dye hem vp ghegheuen hebben, als Arnhem, Thielt Bommele etc. ghelijc hier breeder nauolcht.

¶ Item gheduerende dese oorloghen, wert aflijuich Philibeert Hertoghe van Sauoyen, ende es vrau Margriete naer dye doot van hueren manne ghereyst int lant van Ghelre, ene van daer ghereyst nae Tshertoghen Bossche, verbeydende den Eertshertoghe haren broeder, ende van daer weder wech ghereyst.