Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Die Heraut vanden Coninc van Inghelant.

Mijn souuerayn here die Coninck belast mi te segghen, aenghemerct dat groot ghebrec van paeyse in Christenrijck, waer omme dat die tyrannissche Turck, viant van dat ghelooue der helegher kercken, nv daghelijcx seer groot ghewelt doet ende foortse in Christenrijck, raserende steden ende sloten ende dye goeden der Christenen ende derghelooueghen nemende met haer leuen, deerlicken vermoordende. Ende dat v ondersaten hebben oock vercracht dye heleghe stadt van Roomen ende die ghedispoliert ende berooft, ende die persoon van onsen heleghen vader den Paeus inder stadt Gods Vicarius gheuanghen ghenomen, ende hebt oock grooten twist metten Christelijcken Coninck van Vranckerijc, die v groote ghiften ende Rantsoenen ghepresenteert heeft, hem submitterende al wat redelijck es te doene om paeys ende accoort te hebben. Oock sijdy hem schuldich een groote somme van penninghen die hy v

[fol. xxxviij.r]

gheleent heeft in uwer noot, begherende hem die te betalen. Voort mijn Souuerayn heere ende Coninck om dat hi groote presentacie ende rantsoen v ghepresenteert niet en wilt accepteren, doet v weten met sijnen perpetuael vrient den coninck van Vranckerijcke, die tsamen ghesloten hebben v by foortse van wapenen doen leueren vry ende quijt den Paeus ende oock die kinder van Vranckerijck, v te betalen dat rantsoen dat behoorlijck is. Hier omme begheert van v mijn souuerayn heere ende Coninck, dat ghi den paus terstont vry ende vranck wilt laten gaen, ende die kinderen van Vranckerijcke los laten by een redelic rentsoen, ende dat ghy hem terstont betaelt sonder eenich delay om eenen goeden paeys te hebben. Ende eest dat ghi so niet en doet, so defieren v voort aen mijn Souuerayn heere metten Christelijcken coninc van Vranckerijcke, ende declareren v haer vyant te wesen.