Leven van Sinte Clara

[fol. 23rb]

¶ Van haer barnende minne die sij hadde totten ghecruysten Jhesum. Dat XXXV cappittel

Sonderlinghe plach sij te bescreyen dat lijden Ons Heeren ende uut Sijn heilighe wonden plach sij te putten bitter begeerten. Ende nu suect sij daer uut suete bliscapen. Die tranen Christi, die Hij stortte in Sijnen leven ende in Sijn lijden, vervulde sij crachtelijc, ende docht altijt opten Genen Die die diepe minne geprint hadde in haer herte.

Sij leerde die novissiën ende jonghe susterkins, dat sij den gecruysten Christum bescreyen souden. Ende dat sij hem leerde metten woerden, dat vervulde sij metten wercken. Want dicwil als sijse int heimelijc vermaende tot alsoe danighen dingen, began sij te screyen, eer sij die woerden uutbroecht.

¶ Tusschen sexte tijt ende noen tijt plach sij altijt meere devocie te hebben tot Sijnre passiën ende bitter lijden, op dat sij den ombevlecten Heer een sacrificie daer mede offeren woude.

Op eenen tijt als sij te noen

[fol. 23va]

tijt in grooter devociën lach in haer celle, soe quam die duvel ende sloechse aen haer wanghe wreedelijc, soe dat haer oege bloedende wert ende liep over al dat maechdelijcken aensiecht.

Ende op dat sij haer altijt sonder ophouden mocht voeden wellusten des ghecruysten Christi, soe plach sij altijt devotelijc te spreken een gebet vanden V wonden Christi ende dat officium vanden Heiligen Cruys. Alsoe dat die minner des Cruys haer geleert hadde, plach sij te oefenen met grooter begeerten. Sij gorde op haer naecte lijf een corde van XV knopen, gemaect ter eeren der wonden Ons Heeren Jhesum.