Den Bybel met groter neersticheyt ghecorrigeert (Liesveltbijbel 1542)

¶ Hoe Sara sterf, ende Abraham eenen acker cochte vanden kinderen Heth, tot een begrauinge sijns geslachts

Dat .xxiij. Capitt.

1

⁺SAra wert hondert ende seuen en twintich iaer out, so lange leefde si,

+ A vers 1

2

ende sterf, inder hooftstadt die heet Hebron inden lande Canaan, Doen quam Abraham dat hijse beclaghen ende beweenen soude,

3

Daer na stont hi op van sinen lijcke, ende sprac met den kinderen Heth ende seyde,

4

Ic ben een vreemdelinck, ende een inwoonder met v, geeft mi een erfbegrauenisse bi v lieden, dat ic mijnen dooden begraue die voor mi leyt.

5

Doen antwoorden Heths sonen Abrahamme ende spraken tot hem,

6

Hoort lieue here, ghi sijt een vorst Gods midden onder ons. Begraeft uwen dooden in onse costelijcke grauen, geen mensce van ons en salt v verbieden dat ghi in sinen graue uwen dooden begraeft.

7

Doen stont Abraham op ende neech voor den volcke des lants (te weten) voor den kinderen Heth.

8

Ende hi sprac met hen ende seide. Belieuet v dat ic minen dooden voor mi begraue, ⁺ so horet mi ende bidt voor mi aen Ephron den sone Zophar,

+ B vers 8

9

dat hi mi geue voor v lieden zijn dubbel speluncke, die hi heeft in sinen acker voor eenen redeliken penninc voor mi om te sijne tot een erfbegrauenisse,

10

Want Ephron woonde onder die kinderen Heth. Doen antwoorde Ephron die Hethiter Abraham, dattet die kinderen van Heth hoorden, voor allen den genen die tzijnder stadt poorten wt ende in gingen ende seide

11

Neen mijn here, mer hoort mi, Ic geue v den acker, ende die speluncken daer in ooc, ende ic geuen v voor den ogen der kinderen mijns volcx, te begrauen uwen doden.

12

Doen buygede hem Abraham voor dat volc des lants, ende sprac met Ephron dat toehoorde dat volc des lants, ende seide,

13

Wildy mi verhooren so neemt van mi des ackers gelt, dat ict v geue, so sal ic mijnen dooden begrauen.

14

⁺Ephron antwoorde Abraham ende sprac tot hem,

+ C vers 14

15

mijn here hoort mi, dat velt is .cccc. sikel siluers weert, mer wat is dat tusscen v ende mi? Begraeft slechts uwen dooden.

16

Abraham verhoorde Ephrun ende woech hem daert gelt dat hy geseyt had, dattet de kinderen Heths hoorden, te weten cccc. sikel gekuerst siluers, ende gancbaer der munten

17

Also wert Ephron acker daer die dubbel speluncke in is, teghen Mambre ouer, Abrahe tot eygenen goede beuesticht, metter speluncken daer inne, ende met allen den boomen opten acker rontom,

18

dattet die kinderen Heth aensagen, ende alle die tot sijnder stadtpoorten wt, ende in gingen,

19

Daer na begroef Abraham sijn wijf Sara, ⁺ in die speluncke des ackers, die dubbel is teghen Mambre ouer, dat is Hebron int lant Canaan,

+ D vers 19

20

Also wert beuesticht den acker metter speluncken die daer in is Abraham ter erfgrauenissen vanden kinderen Heth