Den Bybel met groter neersticheyt ghecorrigeert (Liesveltbijbel 1542)

Iacob coemt totter fonteynen bi Haram, Hi watert Labans schapen, hy verthoont hem seluen Rachel, hy dient Laban seuen iaer om Rachel, Hy wordt in Lea bedroghen, hy dient weder seuen iaer om Rachel, Lea baert hem vier sonen, ende Rachel is onuruchtbaer.

Dat .xxix. Capittel.

1

⁺IAcob hief doen sijn voeten op, ende ghinck in dat Oosten lant, ende sach om, ende siet, daer was een fonteyn opten velde

+ A vers 1

2

ende siet, drie cudden schapen daer by.

Wandt vander fonteynen moesten die cudden gedrinct worden, ende daer lach eenen grooten steen voor dat gadt der fonteynen,

3

ende dye herderen plegen aldaer te vergaderen, ende den steen van dat gadt der fonteynen te wentelen, ende dye schapen te drincken, ende deden als dan den steen weder voor op dat gadt op sijn stede.

4

Ende Iacob sprack tot hen Broeders van waer sidy? Si antwoorden, Wi sijn van Haran,

5

Hi seyde tot hen, Kendy ooc Laban den sone Nahor? Sy antwoorden, Wy kennen hem wel,

6

Hy sprac, Gatet hem oock wel? Si antwoorden, Het gaet hem wel, ende siet, daer coemt sine dochtere Rachel met den schapen,

7

Hi sprac, Het is noch hooch dach, ende ten is noch gheen tijdt, dat vee in te drijuen, drencket die schapen, ghaet henen ende weytse,

8

Sy antwoorden, ⁺ Wi en connen nv tot dat al die herderen te samen vergadert sijn, ende den steen van dat gadt der fonteynen wentelen, ende alsoo die schapen drincken.

+ B vers 8

9

Als hi noch met hen sprack, quam Rachel metten scapen haers vaders, want si hoede die scapen,

10

Als Iacob Rachel sach Labans dochter, sijns moeders broeders, ende Labans sijns moeders broeders scapen ghinc hem toe, ende wentelde den steen vanden gate der fonteynen ende drencte die scapen sijns moeders broeder,

11

ende custe Rachel, ende hief op sijn stemme, ende weende,

12

⁺ende seyde haer, dat hy was haers vaders broeder, ende Rebecas sone, Doen liep si, ende seydet haren vader.

+ C vers 12

13

Als Laban hoorde van Iacob sijnder suster sone, so liep hi hem te ghemoete, ende omhelsde hem, ende custe ende brocht hem in zijn huys, Doen vertelde hy hem alle dese gheschiedenissen.

14

Doen sprac Laban tot hem. Ghy sijt mijn been ende mijn vleesch, blijft bi my een maent lanc,

15

daer na sprac hi tot Iacob, Al sidy mijn broeder, soudi my daerom om niet dienen? Segt wat sal uwen loon sijn?

16

⁺Laban had twee dochteren, die outste hiet Lea, ende die ioncste hiet Rahel,

+ D vers 16

17

Mer Lea was teer van oogen, Rahel was scoon van aensichte, ende van ghedaenten,

18

dye selue creech Iacob lief ende sprack, Ic wil v seuen iaer dienen om Rahel, die ionckste dochtere,

19

Laban antwoorde, Het is betere dat ickse v gheue, dan eenen anderen, blijft bi my.

20

Aldus diende Iacob om Rahel seuen iaer, ⁺ ende het dochte hem luttel dagen te wesen, so lief had hy haer,

+ E vers 20

21

ende Iacob sprac tot Laban, geeft mi mijn wijf, want den tijt is hier, dat ic bi haer ligghe.

22

Doen noode Laban alle die lieden van dier plaetsen, ende bereyde hem die bruyloft,

23

Mer des auonts nam hi sine dochter Lea, ende brachtse tot Iacob, ende hi besliepse,

24

ende Laban gaf Lea sijnder dochter Silpa tot eenen ioncwijue.

25

Mer des morgens, Siet, doen wast Lea, Ende hy sprac tot Laban. Waerom hebdi mi dat gedaen? Heb ic v niet gedient om Rahel? Waerom hebdi mi dan bedrogen.

26

Laban antwoorde, ⁺ Men doet niet also in onsen lande, datmen die ioncste wtgeeft voor die outste,

+ F vers 26

27

houdt dese weken wt, so sal ic v dese ooc geuen om den dienst, die ghi my noch ander seuen iaren dienen sult,

28

Iacob dede alsoo, ende hielt die weken wt.

29

Doen gaf hi hem Rahel zijn dochtere ten wiue, ende Laban gaf Rahel zijn dochter een ioncwijf, dye hiet Bilha.

30

Alsoo lach hi ooc bi Rahel, ende had Rahel lieuer dan Lea, ende diende hem ooc voort dander seuen iaer

31

Als die HERE sach dat Lea ghehaet wert, maecte hise vruchtbaer, ende Rahel onuruchtbaer,

32

ende Lea ontfinc, ende baerde eenen soon, dien hiet si Ruben, ende sprac, ⁺ die HERE heeft aengesien mijn allende, nv sal mi mijn man lief hebben,

+ G vers 32

33

Ende noch eens ontfinck si, ende baerde eenen soon, ende seide. Die HERE heeft gehoort dat ic gehaet ben, ende heeft mi ooc desen gegeuen, ende hiet Simeon

34

Noch eens ontfinc si, ende baerde eenen soon, ende sprac, Nv sal hem mijn man weder tot mi doen, want ic heb hem drie sonen gebaert, daerom hiet si hem Leui.

35

Ten vierden ontfinck si ende baerde eenen sone, ende sprac. Nv wil ick den HERE dancken, daerom hiet si hem Iuda, ende hielt op te baren.