Den Bybel met groter neersticheyt ghecorrigeert (Liesveltbijbel 1542)

¶ Van die wijnghe Aarons des ouersten priesters ende sine sonen, ende ooc des outaers

Dat .xxix. Capittel

1

⁺DIt ist dat ghy ooc doen sult, op dat si mi tot priesters ghewijt worden, Neemt eenen iongen verre, ende twee rammen sonder smette,

+ A vers 1

2

ende ongheheeft broot, ende ongheheefde koecken, met olie gemengt ende ongeheefde vladen met olye bestreken, van tarwen mele suldijt al maken,

3

ende sullet in eenen korf leggen ende inden korf daer brenghen met den varre ende metten twee rammen

4

Ende ghi sult Aaron ende sine sonen voor die duere der tenten des getuygenis brengen ende met watere wasschen,

5

ende die cleederen nemen, ende Aaron aentrecken den engen rock, ende den siden roc, ende den lijst ooc, ende den borstlap tot den lijfrock, ende ghi sult hem gorden buyten opten lijfrock,

6

ende den hoet op sijn hooft setten, ende die heylige croone aenden hoet,

7

ende ghi sult nemen die salfolye, ende op sijn hooft storten, ende hem saluen.

8

⁺Ende sijn sonen suldy ooc daer by brenghen, ende den enghen rock aentrecken,

+ B vers 8

9

ende beyde Aaron ende sijn sonen ooc met gordelen gorden, ende hen die huyuen opt hooft binden, dat si dat priesterdom hebben, tot eewelijcker zeden

10

Ende ghi sult Aaron ende sinen sonen die handen vullen, ende die varren daer brengen voor die tente des ghetuygenis, ende Aaron met sinen sonen sullen haer handen op des verren hooft leggen, ⁺

+ Le. iij.c.

11

ende ghi sult den varre slaen voor den HERE voor die dore der tenten des getuygenis,

12

ende ghi sult zijn bloet nemen, ende op des outaers hoornen doen met uwen vinger, ende al dat ander bloet aenden vloer des outaers ghieten.

13

Ende ghi sult alle dat vet nemen, dat dat ingewant bedect, ende dat net dat ouer die leuere is, Ende die twee nieren metten vette dat daer ouer leyt, ende ghi sullet opten outaer ontsteken,

14

⁺Maer des verren vleesch, vel, ende mest, suldy buyten voor den legere met viere verbernen, want het is een sondoffer.

+ C vers 14

15

Ende den eenen ram suldi nemen, ende Aaron met sinen sonen sullen haer handen op sijn hooft leggen,

16

dan suldy hem slaen, ende van sinen bloede nemen, ende opten outaer sprengen rontsomme.

17

Ende den ram suldy deylen in stucken, ende sijn ingewant wasschen, ende die schenckelen, ende ghy sullet op legghen, op sijn ghehouden vleesch, ende op sijn hooft,

18

ende den gheheelen ram aensteken opten outaer, ⁺ want hi is een brantoffer, een soet gheruec des offers des HEREN.

+ D vers 18

19

Den anderen ram suldi nemen, ende Aaron met sinen sonen sullen haer handen op zijn hooft leggen,

20

ende ghi sult hem slaen, ende vanden bloede nemen, ende doent op eynde vander rechter ooren, van Aaron, ende sine sonen, ende opten duym van haerder rechter hant, ende opten groten teen haers rechten voets, ende ghi sult dat bloet opten outaer sprengen rontom,

21

ende ghi sult vanden bloee dat opten outaer is nemen, ende salfolye nemen, ende Aaron

[p. *]

ende sijn cleederen, sijn sonen, ende haer cleederen besprengen, so sal hi ende sine cleederen, sijn sonen ende hare cleederen gewijt sijn.

22

Daer na suldi nemen dat vet vanden ramme, ende den steert, ende dat vet dat dat inghewant bedeckt, dat net ouer die leuere ende die twee nyeren met den vette dat daer ouer is, ende die rechte scoudere (want het is eenen ram der vullingen)

23

ende een stuc broots ende een olykoec, ende een vlade wt den korue des ongheheefts broots dye voor den HERE staet,

24

ende legget al op Aarons handen, ende sijnder sonen handen, ende verrueret den HERE,

25

Daer na nemet van haren handen, ende onsteket opten outaer, tot eenen brantoffer, tot eenen soeten ruecke voor den HEERE, Want dat is des HEEREN offer

26

Ende ghi sult die borst nemen vanden ramme van Aarons vullinghen, ende ghi sullet voor den HERE verrueren, dat sal v deel sijn,

27

⁺Ende ghi sult also heiligen die Verruerborst, ende die hefscouder die verruert, ende opgheheuen sijn vanden ramme der vullingen Aarons, ende sijnder sonen,

+ E vers 27

28

ende tsal Aaron ende sijnder sonen deel sijn, tot een eewige zede, vanden kinderen van Israel, want het is hefoffer, ende dat Hefoffer sal des HEREN sijn vanden kinderen van Israel aen hare

[afbeelding]

dootoffer, ende Hefoffer die si den HERE doen.

29

Ende die heylige cleederen van Aaron sullen sijn sonen hebben na hem, dat si daer inne ghesalft, ende hare handen geuult worden,

30

so wie dat onder alle sijn sonen in sijn stede priester wort, die sal die cleederen seuen dagen aendoen, dat hi gae in die tente des getuygenis, ⁺ om te dienen inden heylighen

+ F vers 30

31

Ghi sult nemen den ram der vullinghen, ende sijn vleesch aen eenen heylighen hoec koken.

32

Ende Aaron met sinen sonen sullen des selfs rams vleesch eten metten broode des korfs, voor die duere der tenten des getuygenis,

33

want daer is versoeninge mede gesciet, te vullen haer handen, dat si gewijt worden, Een vreemde en sal daer niet af eten, want het is heylich.

34

Mer blijfter wat ouer vanden vleesche der vullinghen, ende vanden broode, tot des morghens, dat suldy met vier verbernen ende niet laten eten, want het is heilich,

35

ende ghi sult also met Aaron, ende sinen sonen doen, al dat ic v geboden heb, Seuen dagen suldi hare handen vullen,

36

ende dagelicx eenen verre totten sondoffer slaen om der geenre wille die versoent worden, ende ghi sult den outaer ontsondigen als ghi hem versoent, ende ghi sult hem saluen dat hi ghewijt worde,

37

seuen daghen suldi den outaer versoenen ende wijen hem, dat hi si een outaer des Alderheylichsten, die desen outaer raecken sal die sal gewijt sijn.

38

⁺Ende dit suldi met den outaer doen, twee iarige lammeren suldi alle weghe des daechs daer op offeren,

+ G vers 28

39

Een lam des morghens, dat ander des auonts,

40

Ende tot eenen lamme een thienden deel tarwen meels, gemenghet met een vierendeel van een Hin ghestooten olye, ende een vierendeel van een Hin wijns, tot een drancoffere,

41

Met den anderen lam, tsauonts suldi doen gelijc met den spijsoffer des morgens tot eenen sueten ruecke des offers den HERE,

42

dat is dat dagelicx brantoffere by uwen nacomelinghen, voor die duere der tenten des getuychnis, voor den HEERE, daer ick v betuygen ende met v spreken sal.

43

Daer wil ick den kinderen van Israel getuyghet ende gheheylicht worden, in mijnder heerlicheyt,

44

ende ic sal die tente des getuychnis met den outaer heyligen, ende Aaron, ende sijn sonen, my tot priesters wijen,

45

Ende ic sal onder die kinderen van Israel wonen, ende haer God sijn,

46

dat si weten sullen, dat ic ben die HERE haer God dyese wt Egipten lant brochte om dat ic onder hem wonen soude, Ic die HERE haer God.