Den Bybel met groter neersticheyt ghecorrigeert (Liesveltbijbel 1542)

Vanden outaer des wieroockens van dat metalen hantuat, van dye wijnghe des salfolijs, ende rueckwercs

Dat .xxx. Capittel.

[p. *]

1

⁺GHy sult ooc eenen rueckoutaer van vueren houte maken, om rueck daer op te maken,

+ A vers 1

2

een elle lanc ende breet, gelijck viercant, ende twee ellen hooge met sinen hoornen,

3

ende sulten met louteren goude ouertrecken, sine dac, ende sijn mueren rontsomme, ende zijn hoornen, Ende ghi sult een croonken van louteren goude daeromme maken,

4

ende twee gulden ringen onder dat croonken aen beyde siden, datmen hantboomen daer inne doe, ende hem daer mede drage.

5

Die hantboomen suldi ooc van vueren houte maken, ende met gout ouer trecken,

6

ende sulten setten voor dat voorhancsel, die voor die arcke des ghetuychnis hanct, ende voor den ghenadenstoel die opt ghetuychnis is van daer ic v betuygen sal.

7

Ende Aaron sal daer op rueck maken, goet rueckwerc alle morgen als hi die lampe bereyt,

8

des ghelijc als hi die lampe ontsteect ontrent den auont, sal hi ooc sulcken rueck maken, ⁺ Dat sal dat daghelijcs gerueck sijn voor den HERE bi uwen nacomelinghen,

+ B vers 8

9

ghi en sult geen vreemde geruec daer op doen, ooc gheenen brantoffer noch spijsoffer, ende geen drancoffer daer op offeren.

10

Ende Aaron sal op sijn hoornen versoenen een mael tsiaers met den bloede des sondoffers, dat daer offeren die daer versoent worden, ende dat sal gheschien bi uwen nacomelingen, want dat is den HERE dat alderheylichste

11

Ende die HERE sprac met Mose segghende,

12

Als ghi die hoofden der kinderen van Israel telt, ⁺ so sal een yegelijc den HERE gheuen die versoeninge sijnder sielen, ⁺ op dat hen niet en ouercome een plaghe als si ghetelt worden.

+ Nv. i.a.

+ le. xxxij nu. iij.g. ese xlv d

13

Ende een yegelijc die mede int getal is, sal eenen haluen Sikel gheuen, na den Sikel des heylichdoms. Eenen Sikel ghelt twintich Gera, Alsulcken haluen Sikel sal dat hefoffer des HEREN sijn,

14

Wie dat int ghetal is, van twintich iaren ende daer ouer, die sal dat Hefoffer den HEERE gheuen.

15

Die rijcke en sal niet meer gheuen, ende die arme niet min dan den haluen Sikel, dienmen den HERE tot eenen hefoffer gheue, voor die versoeninge haerder sielen,

16

Ende ghi sult alsulcken gelt der versoeninghen nemen vanden kinderen van Israel, ende aenden Gods dienst des tabernakels, des ghetuychnis leggen, dattet si den kinderen van Israel een gedachtenis voor den HEERE, dat hi hem late ouer hare siele versoenen.

17

⁺Ende die HERE sprac met Mose, seggende,

+ C vers 17

18

ghi sult ooc een metalen hantuat maken, met eenen metalen voete, om te wasschen, ende sullet stellen tusscen den Tabernakel des ghetuychnis, ende den outaer, ende water daer inne doen,

19

dat Aaron ende sijn sonen, haer handen ende voeten daer wt wasschen,

20

als si inden tabernakel des ghetuychnis gaen, oft tot den outaer,

21

dat si den HERE dienen met ruecoffere, op dat si niet en steruen. Dat sal een eewige zede sijn, hem ende sinen zade, bi haren nacomelinghen

22

Ende die HEERE sprac met Mose, seggende

23

Neemt tot v specerie der bester Myrren, vijf hondert Sikel ende Cynnamum half so veel, vijftich ende twee hondert, ende Kaniels ooc vijftich ende twee hondert,

24

ende Casien vijfhondert, naden Sikel des Heylichdoms, ende olye van olijfboomen een Hin,

25

maect een heylighe salfolye, na der apoteken conste

26

⁺Ende ghi sult daer mede saluen die tente des getuyghenis, ende die Arcke des ghetuygenis,

+ D vers 26

27

die tafel met alle haer ghereetschappen, den candelaer met sijnder ghereetschappen, den Rueckoutaer,

28

den brantoffer outaer, met alle sine ghereetschap, ende dat handtuat met sinen voete

29

ende ghi sultse alsoo wijen, dat si dat alderheylichste sijn, want wie datse raken sal, die sal ghewijt sijn,

30

Aaron ende sijn sonen suldy oock saluen, ende wijense mi tot priesters

31

Ende ghi sult met den kinderen van Israel spreken, ende segghen. Dese olye sal mi een heylige salue sijn bi uwe nacomelinghen,

32

si en sal niet op menschen ghegoten worden, Ghi en sult ooc desghelijc niet maken, want het is heylich, daerom salt v heylich sijn.

33

Wie dat alsulcken maect, oft eenen vreemden daer af geeft die sal van sinen volcke wtgheroeyt worden

34

Ende die HERE sprac met Mose. Neemt specerye, balsem, stacten, galham, ende suuer wierooc, deen so veel als dander,

35

ende maect ruecwerck daer af, nae der apoteken conste ghemengt, dattet suyuer si totter heylicheit,

36

ende ghi sullet te puluer stooten, ende stellent voor dat ghetuyghenis, in die tente des getuyghenis, van daer dat ic v betuyghen sal, dat sal v dat alderheylichste sijn

37

Ende des gelijcken ruecwerc, en suldi voor v nyet maken, maer het sal heylich sijn den HERE

38

Wie dat een alsulcken maken sal, dat hi daer mede rueck make, die sal wtgeroeyt worden van sinen volcke