Den Bybel met groter neersticheyt ghecorrigeert (Liesveltbijbel 1542)

¶ Wat werckmeesters datmen hebben soude om dat voorscreuen te maken, Van die houdinge des Sabbaths, van die geuinghe der steenen tafelen

Dat .xxxi. Capittel.

[afbeelding]

1

⁺ENde dye HERE sprac tot oMse, segghende.

+ A vers 1

2

Siet, Ic heb met namen gheroepen Bezaleel Vri soon, die Hur soon was vanden gheslachte Iuda,

3

ende hebbe hem veruult met den geest Gods, met wijsheyt ende verstant, wetentheyt, ende met alderley werc constelijc,

4

om in gout te wercken, in siluer, latoen,

5

constelijc steen te snijden, ende in te setten, ende constelijc te tymmeren van houte, te maken alderley werc.

6

Ende siet, ic hebbe hem eenen gheselle gegheuen Ahaliab Ahisamachs soon, ⁺ vanden geslachte Dan, ende ic heb elcken wijsen die wijsheyt int herte ghegeuen, dat si maken sullen al wat ic v geboden hebbe,

+ B vers 6

7

die tente des ghetuygenis, die arcke des ghetuyghenis, den Ghenaden stoel daer op, ende alle gereetscap der tenten,

8

die tafele ende sijn gereetscap, den candelaer, ende alle sijn ghereetscap, den ruecoutaer,

9

den brantoffers outaer met alle sijn ghereetschap, dat handtuat met sine voeten,

10

die officie cleederen ende die heylige cleederen des priesters Aaron, ende die cleederen sijnder sonen, ⁺ om priesterlijc te dienen,

+ C vers 10

11

die salfolye, ende dat ruecwerc van specerie tot den heylichdom, Al wat ic v geboden hebbe, sullen si maken.

12

Ende die HERE sprac met Mose, seggende

13

Segt den kinderen van Israel, ende spreect tot hen. Houdt mijnen Sabbath, want die is een teeken tusschen my ende

[p. *]

v, tot op uwen nacomelingen, Om dat ghi weten sult dat ic die HERE ben die v heyliget,

14

daerom so houdt mijnen Sabbath, want hi sal v heylich sijn, wie hem ontheylicht, die sal die doot steruen, Want wie dat eenich werc daer in doet, diens siel sal worden wtgeroeyt van sinen volcke.

15

Ses dagen salmen wercken, mer den seuenden dach is die Sabbath, die heylighe ruste des HEREN. Wie dat eenich werck doet, inden Sabbath dach, die sal die doot steruen,

16

Daerom sullen die kinderen van Israel den Sabbath houden dat si hem ooc bi haren nacomelinghen vieren, tot een eewich verbont.

17

Hi is een eewich teeken tusschen mi, ende den kinderen van Israel, ⁺ Want in ses dagen maecte die HERE hemel ende aerde, ⁺ Mer ten seuensten dage rustede hi, ende hielt op.

+ D vers 17

+ gene i.d.

18

Ende als die HERE sijn reden geeynt hadde met Mose, opten berc Sinai, gaf hi hem twee tafelen des ghetuyghenis die steenen waren, ende ghescreuen metten ^a vingher Gods

a vinger Gods, dat is den geest oft cracht Gods luce. xi c Ac. vij c.