Den Bybel met groter neersticheyt ghecorrigeert (Liesveltbijbel 1542)

¶ Vanden brandtoffer outaer, ende sijnder toebehoorte

Dat .xxviij. Capittel.

1

⁺ENde hy maeckte den brandtoffers outaer van vueren houte, vijf ellen lanck ende breet, ghelijck viercant, ende drie ellen hooch,

+ A vers 1

2

ende hi maecte vier hoornen, wtcomende vanden vier hoecken, ende ouertrockse met metale.

3

Ende hy maecte alderley ghereetscap totten outaer, fiepotten, schuppen, beckens, Crauwels, vuerpannen, Ende al van metalen.

4

Ende hy maeckte aenden outaer eenen rooster, ghelijck een nette, van metale al omme, van onder op tot aen dye midden des outaers,

5

ende hi goot vier ringen aen die vier hoecken des metalen roosters tot den hantboomen.

6

Die selue maecte hi van vueren houte, ende ouertrocse met metalen platen,

7

ende hi dedese in die ringen, aen die side des outaers, datmen den outaer daer mede soude draghen,

8

ende hi maecte den outaer van wtghehouden barderen.

Ende hi maecte dat handuat van metale, ende sinen voet ooc van metale, ⁺ op die plaetse der Heerinnen ⁺ die voor die duere der tenten des getuygenis lagen.

+ B vers 8

+ Heerinnen waren deuote oft gheestelijcke bisonderde vrouwen.

9

Ende hi maecte den voorhof, teghen die zuyt side maecte hi een voorhangende cleet hondert ellen lanc

10

van ghetweernder witter siden, met haren twintich calomnen, ende twintich voeten van metale, mer die hoofden ende tgesneden werc van siluere,

11

des selfs ghelijcken teghent Noorden, hondert ellen met twintich calomnen ende twintich voeten van metale, maer hare hoofden, ende dat verheuen werc van siluere.

12

Teghen den Westen, vijftich ellen met thien calomnen ende thien voeten, maer hare hoofden ende verheuen werc van siluere.

13

Tegen den Oosten vijftich ellen vijf thien op elcke side der poorten aenden voohof

14

met drie calomnen, ende drie voeten,

15

dat alle die gespan-

[afbeelding]

nen cleederen des voorhoofs waren van witter getweernder siden,

16

ende die voeten der calomnen van metale, ende haer hoofden ende verheuen werc van siluere,

17

also dat haer hoofden ouertrocken waren met siluer, maer tverheuen werck was silueren aen alle die calomnen des voorhofs.

18

Ende den doec in die poorte des voorhofs maecte hi ghestict van gheelder siden, scaerlaken roset root, ende ghetweernder witter siden, twintich ellen lanc ende vijf ellen hooghe na die mate des hanghenden cleets des voorhoofs,

19

Daer toe ooc vier calomnen met vier voeten van metale, ende haer hoofden van siluere,

20

ende haer coppen, ende tverheuen werc ouertrocken met siluer. Ende alle die nagelen des Tabernakels ende des voorhoofs rontomme waren van metale.

21

Dit is nv die somme der ghereetscappen vanden Tabernakele des getuygenis die vertelt is, so Mose gheseyt heeft, tot den Gods dienste der Leuiten onder de hant Ithamar Aarons des priesters soon

22

die Besaleel dye soon Vrijs des Hur soon vanden gheslachte Iuda maecte, ⁺ alsoo die HERE Mose gheboden hadde,

+ C vers 22

23

Ende met hem Ahaliab die soon Ahisamach vanden geslachte Dan, die was een meester

[p. *]

van snijden, van te wercken, ende te sticken met geelder siden, scaerlaken, roosetroot, ende witter siden.

24

⁺Alle dat gout dat verwrocht is in allen desen wercke des heilichdoms dat daer tot Weefofferen gegeuen wert, dat is negenentwintich talenten, seuen hondert ende dertich Sikel, na den Sikel des heylichdoms.

+ D vers 24

25

Dat getal des siluers dat vander gemeynten quam, dat was hondert talenten, duysent, seuenhondert, vijuentseuentich Sikels, na den Sikel des heylichdoms,

26

Soo menich hooft, also menigen haluen Sikel, na den Sikel des heylichdoms, van allen die getelt worden van twintich iaren aen, ende daer ouer waren ses hondertmael duisent ende .iij.M.ccccc. ende vijftich.

27

Van die hondert talenten siluers gootmen die voeten des heylichdoms, ende die voeten des voorghespannen cleets, hondert voeten van hondert talenten, een talent tot eenen voete,

28

Maer van die duysent, seuenhondert, ende lxxv. Sikels werden gemaect die hoofden der calomnen, ende hare coppen versiluert, met hare verheuen werck.

29

Dat Weefoffer des metaels lxx. talenten twee duysent ende vier hondert Sikels,

30

daer af werden ghemaect die voeten in dye duere der tenten des getuychnis ende den metalen outaer, ende den metalen rooster daer aen, ende alle die gereetschap des outaers,

31

ende ooc die voeten des voorhoofs rontomme, ende die voeten der poorten des voorhofs, ende alle die nagelen des Tabernakels, ende alle die nagelen des voorhofs rontomme.