Den Bybel met groter neersticheyt ghecorrigeert (Liesveltbijbel 1542)

Van Aaron ende sine sonen,, Oock vander wooninghe, widinghe, ende saluinghe.

Dat .viij. Capittel

1

⁺ENde die HERE sprac tot Mose, seggende,

+ A vers 1

2

neemt Aaron met sinen sonen, ende haer cleederen, ende die salfolye, ende eenen verre tot een sondoffer, twee rammen, ende eenen korf met ongheheefden broode,

3

ende alle die ghemeynte voor dye duere der tenten des getuychnis.

4

Mose dede so hem de HERE geboot, ende

[p. *]

verghaderde die ghemeynte voor die duere der tentes des getuychnis,

5

ende sprac tot haer ⁺ Dit ist dat dye HERE gheboden heeft te doene.

+ B vers 5

6

Ende Mose nam Aaron met sinen sonen, ende wiessche met water,

7

ende dede hem aen den lijnen rock ende gorde hem metten gordel, ende troc hem den gheelen siden rock aen, ende dede hem den lijfrock aen, ende gorde hem bouen op den lijfrock,

8

Ende dede hem den borstlap aen, ende in dien borstlap Licht ende Volheydt. Ende sette hem den hoet op sijn hooft,

9

ende setten aenden hoet, bouen sijn voorhooft een gulden plate aen die heylighe croone, also die HERE Mosi dat gheboden hadde.

10

Ende Mose nam die salfolye ende salfde den Tabernakel, ende al datter in was, ende hi wijdet

11

ende sprengde daer mede seuen mael opten outaer, ende salfde den outaer met alle sijnder ghereetschappen.

12

Dat hantvat met sinen voeten dattet ghewijt wert, ende hy goot die salfolye op Aarons hooft, ende salfde hem, ende hy wert gewijt.

13

Ende doen brocht hi ooc Aarons sonen, ende trock hen lijnen rocken aen, ende gordese met gordels, ende bant hen huyuen op haer hooft, also hem dye HERE gheboden hadde.

14

Ende Mose liet daer brengen eenen verre tot eenen sondoffer ⁺ Ende Aaron ende sijn sonen leyden haer handen op zijn hooft, ende men dooden,

+ C vers 14

15

ende Mose nam vanden bloede, ende dedet op die hoornen des outaers, al om den outaer met sinen vinger, ende hi suuerde ende wijde den outaer, ende goot dat bloet opten vloer aenden outaer, ende wijde hem, dat hi hem versoende,

16

ende hy nam al dat vet des ingewants, dat net dat ouer die leuere is, ende die twee nieren metten vette dat daer aen is, ende hi ontstact opten outaer.

17

Maer den verre met sinen velle, vleesch, ende mest verbrande hi metten viere, buyten den legere, also hem die HERE gheboden hadde.

18

Ende Mose bracht eenen ram tot eenen brantoffer, ende Aaron met sine sonen leyden haer handen op zijn hooft, ende doen doodemen hem.

19

⁺Ende Mose sprengde vanden bloede opten outaer al omme,

+ D vers 19

20

ende hy hieu den ram tot stucken, ende hi ontstac dat hooft, ende die stucken ende die crauweye,

21

hi wiesch dat ingewant, ende die schenckelen metten watere, ende hy ontstac also den geheelen ram op den outaer, dat was een brantoffer tot eenen sueten ruecke, een offer den HERE, so hem die HERE gheboden hadde.

22

Ende Mose bracht den anderen ram des vuloffers, ende Aaron met sinen sonen leyden haer handen op zijn hooft, ende doen doodemen hem.

23

Ende Mose nam vanden bloede, ende dedet opt lapken van Aarons rechter oore,

[afbeelding]

ende op den duym van zijnder rechterhant, ende op den groten teen van sinen rechteren voet.

24

Ende Mose bracht ooc Aarons sonen, ende hi dede vanden bloede opt lapken van haren rechteren ooren, ende opten duym van haerder rechter hant, ende opten grooten teen van haren rechteren voet. Ende goot dat bloet al omme opten outaer.

25

Ende Mose nam dat vet ende den steert, ende alle dat vet des ingewants, ende dat net dat om dye leuere is, ende die twee nieren metten vette dat daer aen is, ⁺ ende die rechte schouder.

+ E vers 25

26

Daer toe nam hy wt den korf daer dat ongeheefde broot in was, ende eenen koec geolijts broots ende een vlade, ende leydet op dat vet, ende op dye rechte scouder,

27

ende hi gaf dat alte samen op Aarons ende zijnder sonen handen, ende si weefdent tot een Weefoffer voor den HERE.

28

Ende Mose namt al weder van haren offere, ende ontstact opten outaer bouen opten brantoffer, wandt tis een vuloffer tot eenen sueten rueck, een offer den HERE.

29

Ende Mose nam die borst, ende verhiefse, ende Weefdese tot een Weefoffer voor den HERE, ⁺ vanden ramme des vuloffers, die wert Mose tot sinen deele, so hem die HERE geboden hadde.

+ F vers 29

30

Ende Mose nam die salfolye, ende dat bloet opten outaer, ende sprengdet op Aaron ende zijn cleederen, ende op Aarons sonen ende op haer

[p. *]

cleederen. Ende hy wijde also Aaron ende sine cleederen Aarons sonen ende haer cleederen met hen,

31

ende Mose sprac tot Aaron ende sinen sonen. Cooct dat vleesch voor die duere der tenten des getuychnis, ende etet al daer, daer toe ooc dat broodt vanden korue des vuloffers, so mi geboden is ende gheseyt, als dattet Aaron ende sijn sonen eten souden,

32

Mer watter ouer blijft vanden vleessche, ende vanden broode, dat suldy met viere verbranden.

33

Ende ghi en sult binnen seuen daghen niet wtgaen vander dueren der tenten des ghetuygenis, tot dien dage, dat die dagen des vuloffers veruult sijn, want seuen dagen sijn v handen geuult, ⁺ also dat nv in desen dage gesciet is,

+ G vers 33

34

die HERE heuet geboden te doen, op dat ghi versoent sout sijn.

35

Ende ghi sult voor die tente des getuygenis dach ende nacht blijuen seuen dagen lanck, Ende ghi sult gaey slaen die bewaernisse des HEEREN op dat ghi niet en sterft, want also ist mi gheboden,

36

Ende Aaron met sinen sonen dedent, al dat dye HERE door Mose gheboden hadde.