Den Bybel met groter neersticheyt ghecorrigeert (Liesveltbijbel 1542)

Hoe Aaron ende sine sonen eerst den offer voor die sonde ghebruyct hebben, Ende dat vier van God ghesonden, die dat brantoffer verteert heeft.

Dat .ix. Capittel.

1

⁺ENde opten achsten dach riep Mose Aaron ende sijn sonen, ende die ouders in Israel, ende sprac tot Aaron,

+ A vers 1

2

Neemt een ionck kalf tot een sondoffer, ende eenen ram tot een brantoffere, beyde sonder smette, ende brengtse voor den HERE, Ende spreect met den kinderen van Israel, segghende.

3

Neemt eenen bock tot eenen sondoffer,, ende een kalf, ende een schaep beyde een iaer out, ende onbesmet, tot eenen brantoffer

4

ende eenen ossche, ende eenen ram, tot een dootoffer, op dat wi voor den HERE offeren, ende een spijsoffer met olye ghemengt, Want heden sal v die HERE openbaren.

5

Ende si namen al dat Mose geboden hadde, voor dye duere der tenten des ghetuygenis, ende alle die ghemeynte quam daer bi, ende stont voor den HERE,

6

doen sprac Mose dat ist dat ghi doen sult, ⁺ het welc die HERE gheboden heeft, ende alsoo sal v des HEEREN heerlicheyt openbaren,

+ B vers 6

7

Ende Mose sprac tot Aaron, Gaet totten outaer, ende bereyt uwe sondoffer, ende v brantoffer, ende versoent v, ende dat volc, daer na bereydet des volcx offer, ende versoentse ooc, alsoo die HERE gheboden heeft.

8

Ende Aaron quam totten outaer, ende sloech dat kalf tot sinen sondoffere,

9

ende sijn sonen brochten dat bloet tot hem, ende hi dooptet met sinen vinger int bloet, ende dedet op die hoornen des outaers, ende goet dat bloet opten vloer, aenden outaer,

10

Mer dat vet ende die nieren ende dat nette vander leuere des sondoffers, ⁺ dat ontstack hi op den outaer, Alsoo die HERE Mose beuolen hadde,

+ C vers 10

11

Ende dat vleesch ende dat vel verbernde hi metten viere buyten den legere.

12

Daer na doode hi dat brantoffer, ende Aarons sonen brochten dat bloet tot hem, ende hi sprengdet al om op den outaer,

13

ende si brochten dat brantoffer tot hem ghestuct, ende dat hooft, ende hi ontstact op den outaer,

14

ende hy wiessche dat ingewant, ende die schenckelen, ende ontstact bouen op den brantoffer opten outaer.

15

Daer na bracht hi des volcx offer, ende nam den bock dat sondoffer des volcx,

16

ende dooden, ende maecte een sondoffer daer af, ghelijc dat eerste, ende bracht daer dat brantoffer, ende dedet soot behoort,

17

Ende bracht daer den spijsoffer, ende nams sijn hantvol, ende ontstact op den outaer, sonder des morghens brantoffer.

18

Daer na doode hi den osse, ende den ram tot eenen dootoffer des volcx,

19

Ende sijn sonen brochten dat bloet, dat sprengde hi opten outaer al om. Mer dat vet vanden osse, ende vanden ram, den steert, ende dat vet dat dat inghewandt bedect, ende die nieren, ende dat net dat ouer die leuer is,

20

ende alsulcken vet leyden si op die borst, ende ontstaken dat vet opten outaer,

21

mer die borst ende die rechte schouder die verhief Aaron tot een Weefoffer den HERE, ⁺ so die HEERE Mose gheboden hadde.

+ D vers 21

22

Ende Aaron hief zijn hant op tot den volc ende gebenedidese, ende quam neder vanden wercke des sondoffers, brantoffers, ende dootoffers,

23

Mose ende Aaron gingen in die tente des ghetuygenis, ende als si weder wt quamen ghebenediden si dat volc. Doen openbaerde dye heerlicheyt des HEREN al den volcke,

24

Want dat vier quam wt vanden HERE, ende verteerde opten outaer dat brantoffer, ende dat vet. Als alle dat volc dat sagen waren si vrolic, ende vielen op haer aensicht.