Den Bybel met groter neersticheyt ghecorrigeert (Liesveltbijbel 1542)

Hoe die priesters ende haer huysghesin sijn sullen. Ooc hoe datmen metten offeren handelen sal.

Dat .xxij. Capittel

1

⁺ENde die HERE sprac tot Mosi, seggende,

+ A vers 1

2

Segt Aaron ende sinen sonen, dat si haer wachten vanden geheylichden kinderen van Israel, welc si mi geheilicht hebben, ende mijnen heylighen naem niet en ontheyligen, want ic ben die HERE,

3

soo segt hen ende haren nacomelingen, So wie dat van uwen zade toe gaet totten heyligen, dat welcke die kinderen van Israel den HERE heyligen, ende ontreynicht hem alsoo ouer dat selue, diens siele sal wtgeroeyt worden voor mijn aensicht, want ic ben die HERE.

4

So wie dat van Aarons zade lazarich oft die vloet heeft, die en sal niet eten vanden heyligen, tot dat hi suuer is, wie dat yet onsuuers raect, oft wien dat zaet inden slaep ontgaet,

5

ende wie dat eenich gewormte raect dat hem onsuuer is, of een mensce die hem onsuuer is, ende al wat hem ontreynicht,

6

die welcke siele die daer af yet raect die is onreyn totten auont, ⁺ ende en sal vanden heiligen niet eten, mer sal eerst zijn lichaem met water baden,

+ B vers 6

7

ende als die sonne onder gegaen is, ende hi rein worden is, dan mach hi daer af eten, want het is sijn nootdruft.

8

Een doode prije, ende wat vanden wilden dieren verschoort is, en sal hi niet eten, op dat hi niet onreyn daer af en worde, want ic ben die HERE,

9

daerom sullen si mijn settingen houden, dat si geen sonde op haer en laden, ende daer aen steruen, als si haer aen hem ontheiligen want, ic ben die HERE diese heilicht.

10

Een vreemdelinc en sal vanden heiligen niet eten, noch des priesters huysgenoot, noch ghehuerde knape,

11

Als een priester een siele om gelt coopt, die mach daer af eten,

12

Ende wat hem in zijn huys geboren wort, dat mach ooc van sinen broode eten, Mer als des priesters dochter eens vreemdelincx wijf wort, so en sal die niet vanden Hefoffer der heylicheyt eten,

13

Mer wort si weduwe oft wtgestoten, ende en heeft geen zaet, ende coemt weder tot haers vaders huys, soo sal si eten van haers vaders broot, ghelijckerwijs als een ander deerne.

14

Maer geen vreemdelinc en sal daer af eten, Mer wie anders vanden gheheylichden onwetende eet, dye sal dat vijfste deel daer toe doen, ende den priester gheuen met den geheylichden,

15

op dat si niet en ontheylighen, dat geheylichde der kinderen van Israhel, dat si den HERE heffen,

16

op dat si haer niet met misdaet ende met schult en beladen, als si haer geheylichde eten, want ic ben die HERE dyese heylicht.

17

Ende die HERE sprack tot Mose seggende,

18

Segt Aaron ende sinen sonen, ende al den kinderen van Israel Wie vanden huyse van Israel is, oft een vreemdelinc in Israel, sijn offer doen wil, het si eenige ghelooft, oft van vryen wille, dat si den HERE eenen brantoffer doen willen, om hem te versoenen,

19

dat sal een man-neken sijn sonder smette, vanden runderen oft lammeren, oft geyten,

20

Al dat een smette heeft, en sullen si niet offeren, want si en sullen daer mede geen genade vinden

21

Ende wie dat een dootoffer den HERE doen wil wt sonderlingen eygen belooften, oft van vryen wille, runderen oft scapen, dat sal sonder smette sijn dattet aenghenaem si, het en sal ooc gheen ghebrec hebben,

22

ist blint oft cruepel, oft gewont, oft gebladert, of grillich of scorft so en sullen si dat den HERE niet offeren, ende daer af geen offer opten outaer des HEREN geuen.

23

Een os oft scaep, dat een onbehoorlijc ledt heeft oft dat geenen steert en heeft, ⁺ dat muechdy van vrijen wille offeren, Mer ontfancbaer en salt niet zijn, tot eender belooften,

+ C vers 23

24

Ghi en sult den HERE geen ghestooten oft ghewreuen, oft verschoort oft ghelubt offeren, ende ghi en sult dat in uwen lande niet doen.

25

Ghy en sult uwen Godt niet offeren broot van eens vreemdelincx handt, want het is van hem verdoruen, ende heeft een smette, daer om en salt niet aengenaem zijn voor v

26

Ende die HERE sprac tot Mose segghende, Als een os, oft lam, oft gheyt geboren is, so salt seuen dagen bi zijnder moeder zijn,

27

ende ten achsten dage daer na, machment den HERE offeren, soe ist aenghenaem

28

Het si een osse oft lam, so en salmens niet op eenen daghe slaen, met zijn ionck.

29

Als ghi den HERE een dancoffer doen wilt dattet aengenaem si,

30

so suldijt ten seluen daghe eten, ende en sult niet ouerhouden tot morghen, want ic ben dye HERE,

31

Daer om houdt mijn gheboden, ende doetse want ic ben die HERE

32

dat ghi mijnen heylighen naem niet en ontheylicht ende dat ic geheylicht worde onder die kinderen van Israel, want ic ben die HERE dye v heylicht,

33

dye v wt Egipten leyde, dat ic v God zijn zoude, Ic ben die HERE.