Den Bybel met groter neersticheyt ghecorrigeert (Liesveltbijbel 1542)

Vanden vierdaghen ende hooghe feestdaghen als den Sabath, Paesschen, Pinxten, Louertenten.

Dat .xxiij. Capittel

1

⁺ENde die HERE sprac met Mose seggende,

+ A vers 1

2

Segt den kinderen van Israel- ende spreect tot hen, Dit zijn dye feesten des HEREN, die ghi heylighe dagen heeten sult,

3

Ses daghen suldi v werck doen, maer den seuensten dach, is die ruste des Sabbaths ende sal heylich heeten, geenderhande werc en suldi daer inne doen, want het is dye Sabboth des HEREN, waer dat ghi woont.

4

Dit zijn die feesten des HEREN, die heylich heeten, die ghi uwe feest heeten sult.

5

Den .xiiij. dach der eerster maent tsauonts is des HEREN Paesscen

6

ende inden vijfthienden vander seluer maent, is die feeste der ongeheefder brooden des HEREN, Dan suldi seuen daghen ongheheeft broot eten,

7

Den eersten dach sal heylich genaemt worden onder v, daer in en suldi geen dienstwerc doen,

8

ende den HERE offeren seuen daghen lanck, Den seuensten dach sal ooc heylich genaemt zijn daer in en suldy oock gheen dienstwerck doen.

9

Ende die HERE sprac tot Mose segghende,

10

Segt den kinderen van Israel, ende spreect tot hen, ⁺ Als ghi int lant comt, dat ic v geuen sal, ende sult oocxsten, soe suldy eenen schoof der eerster vruchten ws oochsts totten priester brenghen,

+ B vers 10

11

daer so sal dyen scoof worden voor den HERE geweystert, dat ghi aengenaem wordet, Des anderen daechs na den Sabboth sal dye priester dat doen,

12

Ende ghy sult inden daghe als uwen schoof geweystert wort een brantoffer den HEERE doen, van eenen lammeken dat sonder

[p. *]

smette is, ende dat iarich is,

13

met den spijsoffer, twee tiende deele bloemen meels met olye gemengt, ⁺ tot eenen offer den HERE, tot eenen soeten rueck daer toe ooc dat dancoffer, een vierendeel van een Hin wijns,

+ C vers 13

14

Ende ghi en sult geen broot noch koecken, noch pappen eten tot opten dach, als ghi uwen God offer brengt dat sal een recht sijn uwen nacomelingen, waer dat ghi woont

15

Daer na suldy tellen vanden anderen dagen des Sabbaths daer ghi de weysterscouen in gebracht hebt .vij gehele weken,

16

tot des anderen daechs des seuensten Sabbaths, te weten vijftich dagen suldy tellen, ende nieuwe spijsoffer den HERE offeren

17

ende wt allen uwen wooningen suldijt offeren te weten, twee weysterbrooden van twee thiende bloemen meels gheheeft ende gebacken, tot eerstelingen den HERE,

18

Ende ghi sult daer oock brengen met uwe broot, seuen iarige lammeren sonder smette, ende eenen iongen verre, ende twee rammen, dat sal des HEREN brantoffer spijsoffer ende drancoffer zijn, Dat is een offer, Eenen soeten rueck den HERE.

19

Ghi sult eenen bock dooden, tot eenen sondoffer ende twee iarighe lammeren, tot eenen dootoffer,

20

Ende dye priester salt weysteren voor den HERE, op dat broot der eerstelingen, ⁺ tot den twee lammeren, ende sullen den HERE heylich ende des priesters deel sijn

+ D vers 20

21

Ende ghi sult desen dach wtroepen, want hy sal onder v heylich genaemt zijn, gheen dienstwerc en suldy doen, een eewich recht sal dat zijn, bi uwen nacomelinghen waer dat ghi woont.

22

Als ghi v dat lant oogstet en suldijt niet al af mayen ooc niet alte nauwe op oogsten, maer ghi sullet den armen, ende den vreemdelingen laten, Ic ben die HERE v God

23

Ende die HERE sprac met Mose segghende,

24

Segt den kinderen van Israel, Inden eersten dage der .vij. maent, suldy hebben den heyligen vierdach des gedachtenis der blasingen,

25

daer in en suldi geen dienstwerc doen, ende sult den HERE offer doen

26

Ende die HERE sprac met Mose segghende,

27

⁺Den x. dach van deser seuender maent, is der versoeningen dach, die sal bi v heylich genaemt worden, In dyen dage suldi uwe ^a sielen verootmoedigen, ende den HEERE offer doen,

+ E vers 27

a Sielen verootmoedigen, is tlichaem castijden door vasten ende ander abstinentie esa. lviij a. le. xvi. Nume xxix.a.

28

ende ghi en sult geen dienstwerc doen in desen dage, want het is versoen dach, dat ghi versoent wort voor den HERE uwen God,

29

Want so wat siele haer niet en verootmoediget, in desen dage die sal wt haren volcke wtgeroeyt worden,

30

ende wat siele in desen dage eenich werc doet dye sal ic te niet doen wt haren volcke,

31

Daer om en suldy geen werc doen. Dat sal een eewich recht sijn uwen nacomelingen, waer dat ghi woont,

32

Het is ws Sabbath vierte, dat ghi v siele verootmoedicht, Inden .ix. dage deser maent tsauonts suldy sulc vieren houden vanden eenen auont totten anderen.

33

Ende die HERE sprac met Mose seggende,

34

Spreect metten kinderen van Israel ende segt, ⁺ Inden .xv dage van deser seuender maent, ⁺ is die feeste der Louerten .vij dagen, den HERE, Den eersten dach sal heylich genaemt zijn,

+ F vers 34

+ dit was den dach datmen tot behoef vanden armen die aelmoessen wt der gemeynte vergaderde, ende dat een yegelick sijn gonste brochte.

35

geen dienstwerc en suldi daer in doen,

36

Seuen daghen suldy den HERE offeren Den achsten dach sal ooc heylich ghenaemt sijn, ende ghy sult uwen offer den HERE doen, Want het is den dach der vergaderingen, ende des samenbrengingen, geen dienstwerc en suldi daer in doen.

37

Dit zijn die vierdagen des HEREN, die ghy heylich sult wtroepen daer ghi den HERE, offer in doen sult, brantoffer, spijsoffer, drancoffer, ende ander offer een yegelick na sinen dage,

38

sonder dat offer des Sabbats des HEREN, ende v gauen ende gheloften, ende vrywillige gauen sijn die ghi den HERE gheeft.

39

So suldi dan den .xv. dach der .vij. maent, als ghi die incomende vruchten vanden lande ingebracht hebt, suldy die feeste houden den HERE .vij. dagen lanck,

40

Ten eersten daghe salmen vieren, ende ten .viij. daghe salmen ooc vieren, Ende ghi sult ten eersten dage vruchten nemen van schoonen boomen, palmen, rijseren ende meyen van boomen met dichte breede bladeren, ende wilghen vanden beken, ende .vij. daghen vrolijck sijn voor den HERE uwen God,

41

ende ghy sult den HERE alsoo des iaers die feest houden .vij. dagen, dat sal een eewich recht sijn bi uwen nacomelingen, dat si in die .vij. maent also vieren,

42

Seuen dagen suldi in die loouertenten woonen, Wie datter een ingeboren in Israel is, die sal in die Louertenten wonen, dat v nacomelingen weten moghen, hoe ic die kinderen van Israel in tenten heb laten woonen, doe icse wt Egipten lant leyde, Ic ben die HERE v God,

43

ende Moses sprac totten kinderen van Israel, van desen vierdaghen des HEREN.