Den Bybel met groter neersticheyt ghecorrigeert (Liesveltbijbel 1542)

Tvolck hoereert met die Moabijtsche wijuen, ende aenbidt den Baal Peor, die HEERE hietse straffen, Daer vierentwintich duysent menschen worden ghedoot. Pinehas wt grooter liefte des HEREN doorsteect eenen man ende een wijf in haer sondich werck sijnde

Dat .xxv. Capiittel

1

⁺ENde Israel woonde in Sittin, ende dat volc begonst te hoereren met der Moabiten dochteren, ⁺

+ A vers 1

+ Iosue. xx.ij.d Exodi. xxxij.f.

2

die welcke dochteren nooden dat volck tot haerder Goden offere, ende dat volc adt ende aenbaden hare Goden,

3

ende Israel onderwerp hem BaalPeor, Doen wert die HERE toornich ende gram op Israel,

4

ende sprac tot Mose, Neemt alle die ouerste des volcx, ende hanctse den HERE tegen die sonne, op dat die gramscap des torens des HEREN, van Israel ghekeert worde.

5

Ende Mose sprac totten rechteren van Is-rael, een yegelijc doode sijn hooftlieden, die hen BaalPeor onderworpen hebben.

6

⁺Ende siet een man wt den kinderen van Israel, ghinck in die tegenwoordicheyt van sinen broederen tot een wijf van Madian, ende liet Mose aensien, ende alle die ghemeynte der kinderen van Israel, die daer weenden, voor die duere der tenten des ghetuygenis,

+ B vers 6

7

Als Pinehas Eleazar soon, die Aaron des Priesters soon was dat sach, stont hi op vander gemeynten, ende nam een mes in sijn hant,

8

ende ghinc den Israelijtscen man nae tot in dat hoer huys, ende doorstacse beyde den Israhelijtscen man, ende dat wijf door haren buyck. Doen hielt die plage op, vanden kinderen van Israel,

9

⁺ende het werden gedoot in die plage vierentwintich duysent

+ C vers 9

10

Ende die HERE sprac met Mose, seggende,

11

Pinehas Eleazar soon, Aarons des priesters soon heeft mijn gramscap ghekeert vanden kinderen van Israhel voor sijn vreeselijcke liefde teghen mi, onder hen, dat ic niet in mijnder zeloerscer liefden, die kinderen van Israel te nieute en doe,

12

Daeromme segt hem, Siet, ic gheue hem mijn verbont des vreets,

13

ende hi sal hebben, ende sijn saet nae hem, dat verbont eens eewichs priesterdoms, om dat hi voor sinen God met vreeselijcker liefden beruert is geweest, ende die kinderen van Israel versoent heeft.

14

Ende die Israelijtsche man, die verslagen wert met dat wijf van Midian, ⁺ hiet Simri Salu soon een hooftman des huys vanden geslachte der Simeoniten,

+ D vers 14

15

Dat wijf van Midian, die ooc verslagen wert, hiet Casby Zur dochter, die een ouerste der lieden was in dat geslachte der Midianiten

16

Ende die HERE sprac met Mose seggende,

17

doet den Midianiten leet, ende verslaetse,

18

want si hebben v leet gedaen met haren liste die si v gestelt hebben door Peor ende door haer suster Casbi, die dochter des hooftmans der Midianiten die verslagen is inden dage der plagen om Peors wille ende die plage die daer na quam