Den Bybel met groter neersticheyt ghecorrigeert (Liesveltbijbel 1542)

¶ Hoe die rechters straffen den misdadighen, men en sal den dorsschenden osse den mont niet stoppen. Hoe deen broeder des anderen dooden broeders wijf trouwen sal

Dat .xxv. Capittel

1

⁺ALs eenighen twist tusschen mannen is, soo salmense voor dat recht brengen, ende doen hen recht, ende gheuen den rechtuaerdighen recht, ende den godloosen verdoemen.

+ A vers 1

2

Ende ist dat die godloose slagen verdient heeft, so sal die rechter hem neder heeten vallen, ende men sal hem voor den rechter slaen na die mate, ende tghetal van sijnder misdaet.

3

Alsmen hem .xl. slagen gegeuen heeft, so en salmen hem niet meer slaen, op dat so wanneermen hem meer slagen gheeft, te veel geslagen worde, ende dat v broeder deerlijcken voor uwen ooghen si.

4

Ghi en sult den dorsschenden osse sinen muyl niet toebinden.

5

⁺Als broeders met malcanderen wonen, ende die eene sterft sonder kinderen, so en sal des verstoruens wijf buyten geenen vreemden man nemen, ⁺ Maer haer swagher salse beslapen, ende tot eenen wijue nemen, ende trouwense,

+ B vers 5

+ i tessa. v c cor. x.b.

6

ende den eersten sone die si baert, dien sal hi verheffen na den naem van sinen gestoruen broeder, dat sinen naem niet en worde wtgedaen wt Israel.

7

Maer en genoeghet den man niet dat hi sijn swagerinne nemen soude, so sal si sijn swagerinne opgaen onder die poorte voor die ouders ende segghen, Mijn swager weygert sinen broeder eenen naem te verwecken in Israel, noch mi te houwelijc te nemen,

8

Dan sullen hem die Ouders vander stadt doen halen, ende met hem spreken. Als hi dan staet ende spreect, het en belieft mi niet haer te nemen,

9

soo sal sijn swagerinne voor hem comen voor die ouders, ⁺ ende trecken hem eenen schoen wt van sinen voete, ende spouwen hem in sijn aensicht, ende si sal antwoorden, ende segghen. Also salmen doen eenen yeghelijcken die sijns broeders huys niet maken en wille,

+ C vers 9

10

Ende sinen naem sal in Israel heeten des ongheschoeyts huys.

11

Als twee mannen met malcanderen twist hebben, ende dat wijf vanden eenen loopt toe, om dat si haren man verlossen soude, van des ghenen hant die hem slaet, ende steect haer hant wt, ende grijpt hem met

[p. *]

sine schamelheyt,

12

so suldy haer die hant afhouwen, ende v ooghe en sal haerder niet ontfermen

13

⁺Ghi en sult gheen tweederley gewichte in uwen sack hebben, groot ende cleyn,

+ D vers 13

14

Ende in uwen huyse en sal gheen tweederley Epha sijn, groot ende cleyne,

15

Ghi sult een vol ende recht gewichte, ende een vol ende recht Epha hebben, op dat ghi lange leuen muecht in dat lant dat v die HERE v God gheuen sal,

16

Want die dat doet, die is eenen grouwel den HERE uwen God, ghelijc alle die ghene die quaet doen

17

Ghedenct wat v die Amalekiten inden weghe deden doen ghi wt Egypten troct,

18

hoe si v aentasten inden wege, ende sloegen uwe achterste, alle die onstercke die achter v na quamen, doen ghi moede ende madt waert, ende si en vreesden God niet.

19

Als v de HERE v God in die ruste brengt, van alle v omliggende vyanden, inden lande dat v die HERE v Godt gheeft, tot eender erue om te besitten, so suldy die gedachtenisse der Amalekiten wt doen, van onder den hemel, Dat en vergheet niet.