Den Bybel met groter neersticheyt ghecorrigeert (Liesveltbijbel 1542)

Hier worden twee verspieders tot Iericho ghesonden, ende by Rahab die hoere geherbercht, verborgen ende versaect, ende heymelick wt ghelaten. Waerom si huer een teeken der toecomender ghenaden gheuen

Dat .ij. Capittel.

1

⁺IOsua die sone Nun had twee verspieders heymelic wt geseynt van Sittim, ⁺ ende hen geseyt. Gaet henen besiet dat lant van Iericho, die gingen henen, ende quamen in dat huys eender hoeren, die hiet Rahab, ende laghen aldaer.

+ A vers 1

+ Iac. ij.a heb. ij.b

2

Doen wert den Coninc van Iericho geseyt. Siet, hier sijn in deser nacht mannen in gecomen vanden kinderen Israel, dat lant te bespien

3

Doen seynde die Coninc van Iericho tot Rahab, ende dede haer seggen, Geeft die mannen daer wt, dye tot v in v huys gecomen sijn. Want si sijn gecomen om alle dat lant te bespieden.

[p. *]

4

Mer dat wijf verberch die twee mannen ende sprac ⁺ Daer sijn ymmer mannen tot mi in comen, maer ic en wist niet van waer si waren,

+ B vers 4

5

ende doemen die poorte toe wilde sluyten, doen het duyster was gingen si wt, dat ic niet en weet waer si henen gegaen zijn, iaget hen haestelic na, want ghi sultse vangen

6

Si lietse op den solder climmen, ende si bedectese onder dye vlas stoppelen die si haer op den solder toe bereyt had,

7

mer de mannen iaechden hen na op den wech totter iordanen tot aen die haue, ende men sloot de poorte toe, doen die wt waren die hen na iaechden.

8

Ende eer haer de mannen te slapen leyden, so quam si op tot hen op den solder

9

ende sprac tot haer lieden, Ic weet dat die HERE v dat lant geuen sal, Want uwe veruaernisse is ouer ons geuallen, ende alle inwoonders des lants zijn van uwer toecoemst cranc geworden,

10

want wy hebben gehoort, ⁺ hoe die HERE dat water in de rode zee wtgedroocht heeft voor v, doen ghi wt Egipten reysde. Ende wat ghi den twee coningen der Amoriten, Sihon ende Og op geen side der Iordanen gedaen hebt, hoe ghise verbannet of verdaen hebt.

+ exo. xiiij c

11

Ende sint dat wy sulcx gehoort hebben, so is onse herte versaget, daer en is geenen oprechten moet meer in yemanden in uwer toecoemst, Want die HEERE uwe God, is een God, beyde bouen inden hemel, ende onder opter aerden.

12

⁺Dus sweert mi nv ^a biden HERE, dat om dat ic ontfermherticheyt aen v gedaen hebbe, dat ghi ooc aen mijns vaders huys ontfermherticheyt doet, ende geuet mi een waerteeken,

+ C vers 12

a biden HERE sweeren ende den HERE sweeren scillen van malcanderen als geseyt is ij.paral. xv.c.

13

dat ghi leuen laet mijn vader, mijn moeder, mijn broeders ende mijn susters, ende al wat si hebben, ende behout onse sielen vanden doot,

14

Die mannen spraken tot haer, En doen wi niet ontfermherticheit ende trouwe aen v, als ons die HERE dat lant geeft, so sal onse siele des doots sculdich zijn, also verre als ghi onsen aenslach niet en verraet

15

Doe liet si de selue aen een zeel neder doort venster, want haer huys was aender stadt mueren, ende si woonde ooc op die mueren,

16

⁺ende si sprack tot hen. Gaet op dat gheberchte, op dat si v niet en ontmoeten die v na iagen, ende verberget v aldaer drie dagen, tot dat weder comen die v na iagen, daer na gaet uwer straten.

+ D vers 16

17

Die mannen seyden tot haer Mer wi willen des eedts ontslagen sijn den welcken ghi van ons genomen hebt,

18

als wi int lant comen, ende ghi dat snoer des roset varwen bendels niet in dat venster en knoopt, daer ghy ons mede neder gelaten hebt. Ende tot v in huys vergadert, uwen vader, v moeder, v broeders, ende alle ws vaders huys.

19

Ende so wye ter dueren ws huys wt gaet, des bloet si op sijn hooft, ende wi ontsculdich, Mer alle die in uwen huise sijn, ist dat een hant aen hen geslaghen wert, so sal haer bloet op onsen hoofde zijn,

20

Ende ist dat ghi yet van desen onse aenslage voortsegt, so willen wi des eedts ontslegen sijn dien ghi van ons ghenomen hebt.

21

Sy seyde, het si so ghi segt, ende lietse gaen, ende si ghingen henen ende si knoopte dat roosijn verwen snoer int venster.

22

⁺Si gingen wech ende quamen op tgeberchte, ende bleuen aldaer drie dagen tot dat si weder quamen dye hen na iaechden, want si haddense gesocht op alle straten, maer nochtans niet geuonden,

+ E vers 22

23

Also keerden die twee mannen weder, ende gingen vanden geberchte ende voeren ouer ende quamen tot Iosua den sone Nun, ende vertelden hen allen so sijt geuonden hadden

24

ende seyden tot Iosua. Die HEERE heeft ons alle dat lant in onsen handen gegeuen, Ooc so sijn die inwoonders des lants verbaest voor ons