Den Bybel met groter neersticheyt ghecorrigeert (Liesveltbijbel 1542)

¶ Dat lot Iosephs, ende Ephraims kinderen.

Dat .xvi. Capittel.

1

⁺ENde dat lodt viel den kinderen Iosephs vander Iordanen, teghen Iericho, totten watere by Iericho van Oostenwaert ende die woestijne die opwaert gaet van Iericho, door dat gheberchte BethEl

+ A vers 1

2

ende coemt van BethEl wt tot Lus, ende ghaet door die palen ArciAtaroth,

3

ende trect haer nederwaerts, teghent westen waerts, totten palen Iaphlethi, tot aen die palen des nederen BethHoron, ende tot Gaser, ende dat eynde is tot aen die zee.

4

Dat hebben dye kinderen Ioseph tot eenen erfdeel ghenomen, Manasse ende Ephraim.

5

Die palen der kinderen Ephraim, onder haren gheslachten haers erfdeels vanden oostenwaert, was Atharoth, Adar, totten ouersten BethHoron,

6

⁺ende gaet wt teghent westen by Michmethath, dye teghent noorden leyt, aldaer crommen si haer daer omme, teghen den oosten der stadt ThaenathSilo, ende ghaet daer door vanden oostenwaert tot Ianoha.

+ B vers 6

7

Ende daelt neder van Ianoha tot Ataroth ende Naaratha, ende strect aen Iericho, ende gaet wt aen dye Iordane

8

van Thapuah, gaense teghent westenwaert, tot NahalKana, ⁺ ende haren wtganck is aen die zee.

Dat is dat erfdeel des stams der kinderen Ephraim onder haren geslachten,

+ C vers 8

9

ende alle paelsteden met haren dorpen der kinderen Ephraim, laghen verstroyt onder dat erfdeel der kinderen Manasse,

10

Ende si en verdreuen die Cananiten niet, die tot Gaser woonden, Also bleuen die Cananiten onder Ephraim, tot op desen dach, ende worden chijnsbaer.