Den Bybel met groter neersticheyt ghecorrigeert (Liesveltbijbel 1542)

Ruth maeckt haer bedde aen die voeten Boas des nachts, ende si wort des morgens vroech van hem met sesse maten gersten thuys ghesonden

Dat .iij. Capittel.

1

⁺ENde Noemi haers mans moeder sprac tot haer, Mijn dochter, Ick wil v ruste maken, dattet v wel gae

+ A vers 1

2

Dese Boas onse vrient, bi wiens dernen ghi gheweest hebt, wannet dezen nacht gherste op sinen vloer,

3

Dus badet v ende verhullet v, ende doet v cleet aen, ende gaet neder op dien vloer, dat v niemant en kenne, tot datmen al geten en gedroncken heeft.

4

Als hi dan gaet ligghen, soo merckt die plaetse daer hi neder leyt, ende coemt ende slaet tdecsel op tot sinen voeten, ende legt v daer, so sal hi v wel segghen wat ghi doen sult

5

Si sprac tot haer. Al wat ghi mi segt dat wil ic doen

6

Si ginc neder totten dorschuloer, ende dedet al wat haers mans moeder geboden had,

7

⁺ende doen Boas geten ende gedroncken had, so was sijn herte vrolic, ende leyde hem achter eenen hoop scouen, ende si quam lijselick, of verborgelic ende sloech tdecsel op tot sinen voeten, ende leyde haer daer.

+ B vers 7

8

Doent nv middernacht was, verscricte die man, ende taste om hem, ende siet een wijf lach tot sinen voeten,

9

ende hi sprac, wie sijt ghi? si sprack, Ick ben Ruth v dienstdeerne, breyt dijn vlogelen ouer v maerte. Wandt ghi sijt die Naman.

10

⁺Hi seyde gesegent sijt den HERE mijn dochter Ghi hebt een beter ontfermherticheyt na gedaen, dan te voren, dat ghi niet na iongelingen en sijt gegaen noch rijcke noch arme.

+ C vers 10

11

Nv mijne dochter en vreest niet. Al wat ghi segt dat wil ic v doen, want die gehele stadt mijns volcx weet dat ghi een duechdelijc wijf sijt.

12

Nv het is waer dat ic die Naman oft maech ben, maer daer isser een naerder dan ic, blijft ouer nacht,

13

morgen ist dat hi v neemt, wel, mer en belieuet hem niet v te nemen, so wil ic v nemen also warachtelic als God leeft, slaept tot smorghens, ende si sliep tot smorgens toe, tot sinen voeten

14

Ende si stont op, eer deen den anderen gekennen

[p. *]

conste, ende hi gedachte dat slechs nyemant te binnen en worde, dat een wijf inden dorschuloere gecomen si ende seyde.

15

Lanct den mantel herwaerts dien ghi aen hebt, ⁺ ende hout dien toe, ende si hielten toe, ende hi madt ses maten gersten ende leydet op haer, ende hy quam in dye stat,

+ D vers 15

16

mer si quam tot haers mans moeder, die seide. Hoe staet met v mine dochter? ende si seide haer al wat haer die man gedaen had, ende seide,

17

dese ses maten gersten gaf hi mi, want hi sprac. Ghi en sult niet ydel tot ws mans moeder comen,

18

si sprac. Hout stil mijn dochter tot dat ghi onderuint hoet vergaen sal, of waert henen wil, want die man en sal niet ophouden, het en si dat hijt heden ten eynde brenge.