Den Bybel met groter neersticheyt ghecorrigeert (Liesveltbijbel 1542)

Iabes wort van Nahas den Amoniter beleghet, maer Saul ontsettet ende verlostet.

Dat .xi. Capittel.

1

⁺NAhas die Amonite trock opwaerts ende belegerde Iabes in Gilead, ende al dye mannen tot Iabes spraken tot Nahas, Maect een verbont met ons, so willen wi v dienen.

+ A vers 1

2

Mer Nahas die Amonite antwoorde hen, Daer inne wil ic met v een verbont maken, dat ic v allen dat rechter ooge wt steke, ende maken v te schanden onder alle Israel.

3

Doen spraken tot hem alle die ouders Iabes, Gheeft ons seuen dagen, dat wy boden seynden in alle palen Israel, en isser dan geen salichmaker, so willen wi tot v wt gaen

4

Doen quamen die boden tot Gibeo Sauls, ende spraken dat voor die ooren des volcx. Doen hief al tvolc sijn stemme op ende weende.

5

⁺Ende siet, doen quam Saul vanden velde, achter die runderen ende sprack, wat is den volcke dattet weent, doen vertelden si hem die saken der mannen van Iabes.

+ B vers 5

6

Doen wert den gheest Gods veerdich op hem, als hi sulcke woorden hoorde, ende sijn toornicheyt vergramde seere,

7

ende nam een paer ossen, ende hieuse in stucken, ende seyndese in alle palen in Israel, door die boden, ende dede seggen. Wie niet wt en trect Saul ende Samuel na, diens runderen salmen also doen.

8

Doen viel die vreese des HEREN opt volc dat si wt trocken als een man, ende men teldese te Besek, ende die kinderen Israhel waren drie hondert mael dusent mannen, ende die kinderen Iuda dertich duysendt mannen,

9

ende si seyden den boden die gecomen waren. Aldus segt den mannen tot Iabes Gilead. Morghen sal v hulpe geschieden als die sonne opt heetste is, doen die boden quamen, ende vercondichden dat den mannen tot Iabes, so werden si blide,

10

ende die mannen Iabes seyden, Morgen willen wi tot v wtgaen, dat ghy ons doet, al dat v belieft.

11

Ende des anderen morghens stelde Saul dat volc in drie deelen, ende quam inden legere, aen die morghenwake, ende sloech die Ammoniten, tot dat den dach opt heetste wert. Maer die ouerbleuen worden also verstroyt, dat haerder niet twee bi malcanderen en bleuen.

12

Doen sprack dat volck tot Samuel, Wie sijn die daer segghen, Soude Saul ouer ons heerschen? Geeft die mannen herwaert dat wijse dooden.

13

Maer Saul seyde, Nyemant en sal op desen dach steruen, want die HERE heeft heden salicheyt gegeuen in Israel.

14

Samuel sprac totten volcke, Comt, laet ons tot Gilgal gaen, ende dat conincrijcke aldaer vernyeuwen.

15

Doen ginc al dat volc tot Gilgal, ende maecten Saul daer tot eenen coninck voor den HERE tot Gilgal, ende offerden dootoffer voor den HERE, ende Saul met alle den mannen Israhel verblijden hen daer te male seere.