Den Bybel met groter neersticheyt ghecorrigeert (Liesveltbijbel 1542)

Samuel bewijst onbehagelicheyt ende onschult voor alle den volcke, hi vermaent haer die weldaet ende straffinghe Gods, ende dat si nyeuwers van hem en souden wijcken.

Dat .xij. Capittel

1

⁺DOen sprac Samuel tot al Israel, ic heb uwe stemme gehoort in alle dat ghi mi geseyt hebt, ende hebbe eenen coninc ouer v ghemaect, Ende nv siet, daer gaet uwe coninck voor v henen,

+ A vers 1

2

maer ick ben oudt ende grijsch geworden, ende mijne sonen sijn bi v, ende ic ben voor v henen gegaen, van mijnder ioncheyt aen, tot op desen dach,

3

siet, hier ben ick, antwoort teghen mi voor den HERE ende sinen gesalfden, oft ic yemants ossen oft ezelen genomen hebbe, oft ick yemant gewelt oft onrecht hebbe gedaen, oft ick yemanden verdruct hebbe, oft ic van yemants hant een geschenck genomen hebbe, ende heymelic gehouden, so wil ict v weder geuen.

4

Si seyden ghi en hebt ons geen ghewelt, noch onrecht ghedaen, noch verdruct, noch van yemants hant yet ghenomen.

5

Hi sprack, die HEERE si getuyge tusschen v ende sijn gesalfde in desen dage, dat ghy nyedt in mijnder hant gheuenden en hebt,

6

Si seyden, Iae, ghetuyghen sullen wi sijn. Ende Samuel sprack totten volcke, Die HERE die Mose ende Aaron ghemaect heeft, ⁺ ende uwe vaders wten lande van Egypten gheleyt heeft, ⁺

+ B vers 6

+ ec. xxvi.d.

7

so trect nv herwaerts dat ic v ordeele voor den HEERE ouer alle gherechticheyt des HEREN, die hi aen v ende uwen vaderen ghedaen heeft.

8

Als Iacob in Egypten gecomen was, soe riepen uwe vaderen totten HEERE, ⁺ ende hy sandt Mose ende Aaron, dat si uwe vaderen wt Egipten souden leyden ende lietse in dese plaetse woonen,

+ ge. xlvi. iu. iiij.d.

9

Maer doen si des HEREN haers Gods vergaten, so vercocht hijse onder die macht Sissera, des hooftmans tot Azor, ende onder die macht der Philisteen, ⁺ ende onder die macht des conincx der Moabiten, die streden tegen hen,

+ Iu. vi.

10

Ende riepen weder totten HEERE, ende spraken, wi hebben gesondicht, dat wi den HEERE verlaten hebben, ende Baalim, ende Astharoth gedient, Mer verlost ons vanden handen onser vyanden, so willen wi v dienen

11

Doen sandt die HEERE Ierubaal, Bedam, Iephtah, ende Samuel, ende verloste v rontom van uwer vyanden handen, ⁺ ende liet v seker woonen.

+ i.re. viij. i.re. ij.

12

Mer doen ghi saecht, dat Nahas die coninc der kinderen Ammon, tegen dy quam, so seyt ghi tot my Niet ghi, maer een coninck sal ouer ons heerschen, hoe wel nochtans v God v coninck was,

13

Nv daer, Ghi hebt uwen coninc dien ghi vercoren ende gebeden hebt. Want siet, die HERE heeft eenen coninc ouer v ghesedt,

14

Ist dat ghi nv den HERE vreest, ende hem dient, ende sine stemme hoort, ende den mont des HEREN niet ongehoorsaem en sijt, so suldy beyde, ghi, ende v coninc, die ouer v heerschet, den HERE uwen God

[p. *]

volgen,

15

Mer ist dat ghi des HEREN stemme niet en hoort, mer sinen monde onghehoorsaem sijt, so sal dye hant des HEREN tegen v, ende tegen v vaders zijn

16

⁺Ooc coemt nv herwaerts, ende siet, dat grote dinck dat die HERE voor uwen ooghen doen sal,

+ D vers 16

17

en ist nv niet der tarwen oogst, Maer ick wil den HERE aenroepen, dat hi sal laten donderen ende regenen, dat ghi te binnen wert, ende sien sult dat groot quaet, dat ghi voor des HEREN oogen gedaen hebt, dat ghi eenen coninc begeert hebt.

18

Ende doen Samuel den HEERE aenriep, liet die HERE opten seluen dach donderen ende regenen. Doen vreesde alle dat volc den HERE ende Samuel zeere,

19

Ende spraken al tot Samuel, Bidt den HERE dijnen God, voor uwen knechten. dat wi niet en steruen, want bouen alle onse sonden, hebben wi ooc dat quaet gedaen, dat wi ons eenen coninc begheert hebben.

20

Samuel sprac totten volcke, en vreest niet, Ghy hebt (tis waer) dat quaet al ghedaen, nochtans en wijct niet achter vanden HERE, mer dient den HERE van geheelder herten,

21

ende en wijct na die ydelheit niet, want het een ydel dinck is,

22

want die HEERE en sal sijn volc niet verlaten, om sijns grooten naems wille, want die HERE heeft v begonst te maken hem seluen tot eenen volcke.

23

Mer het si verre van mi, mi seluen alsoo aenden HERE te besondigen, dat ic af soude laten voor v te bidden, ende v te leeren den goeden oprechten wech,

24

Vreeset alleen den HERE, ende dient hem getrouwelic van geheelder herten, want ghi hebt ghesien hoe groote dingen hi met v doet,

25

Mer ist dat ghi qualijck doet so suldy beyde, ghi, ende uwe coninc verloren sijn.