Den Bybel met groter neersticheyt ghecorrigeert (Liesveltbijbel 1542)

Die Philistijnen strijden tegen Israhel, si verslaen Ionathan ende dye andere sonen Sauls, Saul wort ghewont, ende inder vlucht soo doorsteeckt hi hem selfs, ende sijn knecht hem selfs oock

Dat .xxxi. Capittel.

[p. *]

[afbeelding]

1

⁺MAer die Philisteen streden tegen Israel, ende die mannen Israel vluchten voor die Philisteen, ende vielen verslaghen opten gheberchte Gilboa,

+ A vers 1

2

Ende die Philisteen hinghen hen aen Saul, ende sinen sone, ende sloegen Ionathan, AbiNadab, ende Malchisua, dye sonen Sauls,

3

ende den strijt wert hert tegen Saul, ende schutters treften op hem met bogen, ende hi wert seer ghewont vanden schutters

4

⁺Doen sprac Saul tot sinen wapendrager, trect wt v sweert ende doorsteect mi daer mede, op dat dese onbesnedene niet aen en comen ende mi doorsteken, ende bedrijuen eenen spot met mi, Maer sijn wapendrager en wilde niet, want hi vreesde seer, doen nam Saul dat sweert, ende viel daer inne,

+ D vers 4

5

Als nv sijn wapendrager sach dat Saul doot was, soo viel hi oock in sijn sweert, ende sterf met hem,

6

Alsoo sterf Saul ende sijn drie sonen, ende sijn wapendrager, ende alle sine mannen gelijc op dien dach

7

Mer doen die mannen Israel die op geen side des dals ende op geen side der Iordanen waren, sagen dat die mannen Israel geulucht waren, so verlieten si die steden, ende vluchten ooc, ende die Philisteen quamen ende woonden daer in

[afbeelding]

8

Des anderen daechs quamen die Philisteen, om die verslaghen wt te trecken, ende si vonden Saul, ende sijn drie sonen liggen opt geberchte Gilboa,

9

ende hieuwen hem sijn hooft af, ende trocken hem sijn wapen af, ende seyndese alomme inder Philisteen lant, om te vercondigen inden huysen haerder afgoden, ende onder dat volc,

10

ende setten sijn harnasch in dat huys Astharoth, mer sijn lichaem hingen si op die muere tot Bethsan.

11

⁺Doen die tot Iabes in Gilead hoorden, wat dye Philisteen Saul gedaen hadden, so maecten si hen op,

+ C vers 11

12

wat strijtbaer mannen waren, ende ghingen den geheelen nacht, ende namen die lichamen Saul ende sijnder sonen, vander mueren tot Bethsan, ende brochtense tot Iabes ende verberndense aldaer,

13

ende namen haer gebeenten ende groeuense onder den boom te Iabes, ende vasten seuen daghen