Den Bybel met groter neersticheyt ghecorrigeert (Liesveltbijbel 1542)

Tot Elias tijden was daer een groote droochte, ende dieren tijt. Die HERE spijst hem door den raue. Ooc door die weduwe Sarepta.

Dat .xvij. Capittel.

1

⁺ENde Elia die Thisbite wt den borgheren Gilead, sprac tot Ahab, Soo warachtelic die HERE die God Israel leeft, voor dien dat ick stae, ⁺ Het en sal dit iaer noch dauwe noch regen comen het en si dat ict segge.

+ A vers 1

+ iiij.reg. v.c ia. vi.c.

2

Ende dat woort des HEREN quam tot hem ende sprac,

3

Gaet wech van hier, ende keert v tegent oosten ende verberget v aen die beke Crith, die voor die Iordane vliet,

4

Ende ghi sult vander fonteynen drincken, ende ic hebbe den Rauen geboden, dat si v aldaer sullen voeden,

5

Hi ghinck wech, ende dede na den woorden des HEREN, ende ginc wech ende sadt aen de beke Crith die voor die iordane vliet,

6

Ende die Rauens brachten hem broot ende vleesch, des morgens ende des auonts, ende hi dranc wt der beken.

7

Ende het gesciede na sommige dagen, dat dye beke verdroochde, want daer en was geenen reghen inden lande,

8

⁺Doe quam dwoort des HEREN tot hem, ende sprac.

+ B vers 8

9

† Staet op ende gaet tot Zarpat, ⁺ welcke bi Sidon leget, ende blijft aldaer, want ic heb aldaer eender weduwen geboden dat si v voede,

+ Luc. iiij

10

ende hi stont op, ende ginc tot Sarphat, ende doen hi quam aen die dore der stat, siet daer was die weduwe ende raepte hout. Ende hi riep haer ende sprac, Haelt mi een weinich waters int vat dat ic drincke,

11

Doe si ghinc om te halen, riep hi haer ende sprac. Brengt mi ooc een bete broots mede,

12

Si sprac, So warachtelic die HEERE v God leeft, ic en heb geen broot dan een hantuol meels in een Cad, ende een weynich olijs in die cruycke, ende siet ic hebbe een hout of twee geraept, ende gae in, ende wilt mi, ende mijnen soon bereyden dat wi eten ende dan steruen.

13

Elia sprac tot haer, en vreest nyet, gaet henen ende doet so ghi geseit hebt. Nochtans maect mi eerst een

[p. *]

cleyn broot daer af, ende brenget tot mi, v ende uwen sone sult ghijt daer na ooc maken.

14

Want so spreect die HERE die God Israel, dat meel inder Cad en sal niet ontbreken, ende die olycruicke en sal niet vermindert werden, tot dien dage toe, dat het die HERE sal laten regenen opter aerden ⁺

+ lu. iiij.c.

15

Si ginc ende dede so Elia geseyt hadde, ⁺ ende hi adt, ende si ooc, ende haer huis eenen tijt lanc,

+ C vers 15

16

Dat meele inder Cad en ontbrack nyet, ende die olycruycke en minderde niet, na den woorde des HEREN dat hi gesproken hadde door Elia

17

⁺† Ende na dese gesciedenisse wert des wijfs sijnder huisweerdinnen soon cranc, ende sine crancheyt was so seer was so seer hart dat geenen adem meer in hem en bleef,

+ D vers 17

18

ende si sprac tot Elia, wat heb ic met v te doen, ghi man Gods? Ghy sijt tot mi inghegaen dat mijnder misdaet ghedacht soude werden, ende dat mijn soon gedoot soude werden?

19

Hi sprac tot haer ende seyde, Geeft mi uwen sone herwaerts, ende hi nam hem van haren schoot, ende ghinc op in de hoochcamer daer hi woonde, ende leide hem op zijn bed,

20

ende riep den HERE aen ende sprac, HERE mijn God, ⁺ ghi hebt ooc die weduwe daer ic gaste bi ben so qualic gedaen, dat ghi haren soon dooden wildet.

+ iiij.reg. iiij.f ac. xx.c

21

Ende hi strecte hem driewerf ouer tkint, ende riep den HERE aen ende sprac, HERE mijn God, laet dye siele des kints weder tot hem comen,

22

ende die HERE verhoorde die stemme Elia, ende de siele des kints quam weder tot hem, ende wert leuende.

23

Ende Elia nam dat kint ende bracht af vander hooger camer int huys, ende gaft sijnder moeder ende sprac. Siet daer, v soon leeft,

24

Ende dat wijf sprac tot Elia. Nv bekenne ic dat ghi een man Gods sijt, ende des HEREN woort in uwen monde is seker.