Den Bybel met groter neersticheyt ghecorrigeert (Liesveltbijbel 1542)

Die HERE hiet Eliam wederomme tot Ahab gaen, Hy vergadert die priesters Baals ende verworchtse.

Dat .xviij. Capittel.

1

⁺ENde ouer eenen langen tijt, quam dat woort des HEREN tot Elia, inden derden iare ende sprac, Gaet henen ende vertoont v Ahab, op dat ict late regenen opter aerden.

+ A vers 1

2

Ende Elia ginc henen dat hi hem Ahab soude vertoonen, Het was een grote dierte in Samaria,

3

ende Ahab riep Abdia sinen voecht, mer Abdia vreesde den HERE seer,

4

want doe Iesebel de propheten des HEREN wtroeyde, nam Abdia hondert propheten ende verstacse in die holen, Hier vijftich ende daer vijftich, ende voedese met broode ende water,

5

Dus sprac dan Ahab tot Abdia, Trect door tlant, tot allen waterfonteynen ende beken, oft wi hoy, oft gars mochten vinden ende die peerden ende muylen mochten onderhouden, dattet vee niet al en vergae.

6

Ende si deelden hen int lant dat sijt doortrecken souden. Ahab reysde alleen op eenen wech, ende Abdias alleen den anderen wech.

7

⁺Doen nv Abdia opten wech was, siet doen ontmoete hem Elia, ende doen hi hem kende viel hi op sijn aensicht ende sprac, En sijt ghi niet mijne Heere Elia?

+ B vers 7

8

hi sprac Ia, Gaet henen ende segt uwen here, siet Elia is hier,

9

Mer hi seyde. Wat heb ic gesondicht, dat ghi dinen knecht in die handen vanden coninc Ahab wilt geuen op dat hi mi doode?

10

So warachtelic dye HERE v God leeft, daer en is geen volc noch conincrijck derwaerts dat mijn heere nyet gesonden en heeft om v te soecken. Ende als si seyden, Hi en is hier niet, so nam hi eenen eedt vanden conincrijcken ende vanden volcke, datmen v niet geuonden ende hadde.

11

⁺Ende ghi segt nv Gaet henen segget uwen here, Siet Elia is hier,

+ C vers 11

12

Als ic dan wech ginc van v, so soude v den geest des HEREN wech nemen, ick en weet wer-waert, ende ic dan quaem, ende bootscapte dat Ahab ende en vonde v niet, so dode hi mi, mer v knecht vreest den HERE van sijnder ioncheyt op,

13

En ist mijnen heere niet te kennen gegheuen, wat ic ghedaen hebbe doen Iesebel die propheten des HEEREN doode, dat ic der propheten des HEREN hondert verstac hier vijftich, ende daer vijftich, inden speloncken, ende voedese met broot ende water?

14

ende ghi segt, ⁺ Gaet henen segt uwen Heere, Elia is hier, dat hi mi doode

+ D vers 14

15

Elia sprac, so warachtelic die HERE Sebaot leeft, voor den welcken ic sta. Ic wil mi heden vertoonen,

16

doen ginc Abdia wech Ahab te gemoete, ende gaft hem te kennen, Ende Ahab ginc Elia te gemoete,

17

ende doen Ahab Elia sach, sprac Ahab tot hem, sijt ghy die Israel verwerret,

18

Hi sprac, ⁺ Ic en verwerre Israel niet, maer ghi ende ws vaders huys daer mede, dat ghi des HEREN geboden verlaten hebt, ende volcht Baalim na,

+ Elias toont Ahab dat hy selue is die Israel verstoort

19

Wel aen, so seynt nv ende vergadert tot mi geheele Israel opten berch Carmel, ende die vier hondert ende vijftich propheten Baal, ooc die vier hondert propheten des boschkens, die vander tafelen Iesebel eten,

20

Aldus seynde Ahab henen onder alle dye kinderen Israel ende vergaderde die propheten opten berch Carmel.

21

Doe ghinc Elia tot alle den volcke ende sprac. Hoe lange hincket ghi op twee siden? Is die HEERE God, so volcht hem na, Mer ist Baal so volcht hem na Ende dat volc en antwoorde hem niet,

22

Doe sprac Elia totten volcke, Ic ben alleen ouergebleuen een prophete des HEREN, mer der propheten Baal isser vier hondert, ende vijftich mannen,

23

So geeft ons nv twee varren, ende laetse eenen varre verkiesen, ende dien in stucken houwen, ende opt hout legghen, ende gheen vier daer aen legghen, so wil ic den anderen verre nemen, ende opt hout leggen, ende ooc gheen vier daer aen leggen,

24

so roept ghi den naem ws Gods aen, ende ic sal den naem des HEREN aenroepen, der welcker God nv met vier antwoorden sal, die is God.

Ende tgeheele volc antwoorde ende sprac, dats recht ⁺

+ i.re. vi.b

25

Ende Elia sprac totten propheten Baal, ⁺ Verkiest ghy lieden nv eenen varre, ende doeghet ghi voren ende eerst, want uwer isser vele ende eenen groten hoop, ende roept den naem ws Gods aen, ende en legget geen vier aen,

+ E vers 25

26

Ende si namen den varre die hi hen gaf, ende si maecten hem bereet ende aenriepen den name Baal, van smorgens tot des middaechs ende seyden, Baal verhoort ons, Mer daer en was geen stemme noch antwoort, Ende si huppelden ende sprongen om den outaer, so haer gewoonte was,

27

Alst nv middach wert, bespottese Elia ende sprack, Roept luyde, want hi is een God, hy dichtet oft hy heeft te doen, of hi is ouer tvelt, of hi slaept misschien op dat hi ontwake,

28

Ende si riepen luyde, ende prickelden hen met messen ende pinsoenen na haerder wise, tot dat haer bloet daer na volchde.

29

Doen den middach voorbi leden was propheteerden si, tot datmen die spijsoffer doen soude, ende daer en was geen stemme noch antwoorder noch aenmercker.

30

⁺Doen sprac Elia tot alle den volcke, Allet volc come tot mi, Ende doen allet volc tot hem ghinc, heelde hi den outaer des HEREN die ghebroken was,

+ F vers 30

31

ende nam tweelf steenen, na dat getal der stammen der kinderen Iacob, tot welcken dat woordt des HEREN sprac seggende. Ghi sult Israel heeten,

32

ende timmerde van dien steenen eenen outaer inden name des HEEREN, ende maecte om den outaer eenen waterloop, of groeue twee coren Bath wijt,

33

ende maecte dat hout

[p. *]

bereet, ende stuckede oft ontledede den varre, ende stelden opt hout ende sprac, halet .iiij. Cad waters vol, ende gietet op dat brantoffer ende opt hout

34

ende hi sprac, doet dat noch eens, ende si dedent noch eens, Ende hi sprac. Doet dat ten derden male, ende si dedent ten derden male.

35

Ende dat water liep om den outaer henen, ende de groeue wert ooc vol waters.

36

Ende doen die tijt was sijn offere te offeren, ghinc Elia die propheet toe ende sprac, ⁺ HERE God Abraham, Isaac ende Israel, laet heden kenlic werden dat ghi God in Israel sijt, ende ic v knecht, ende dat ic dat alle na uwen woorde ghedaen heb.

+ G vers 36

37

Verhoort mi HERE verhoort mi, dat dit volc wete dat ghi die HEERE God sijt, dat ghi haer hert daer na bekeert,

38

doen viel dat vier des HEREN neder, ende verslinde brantoffer, hout, steenen, ende aerde, ende lecte dat water op inder groeuen,

39

doen allet volc dat sach, vielt op zijn aensicht ende spraken, De HERE is God, de HERE is God,

40

Elia sprac tot hen. Grijpt die propheten Baal dat haerder geen en ontulie, ende si grepense. Ende Elia leydese neder aen die beke Kison ende dodese aldaer

41

Ende Elia sprac tot Ahab, Trect opwaerts, eet ende drinct, want het ruyscht als wildet seer regenen

42

Ende doen Ahab opwaerts trac om te eten ende te drincken, ginc Elia opten top Carmeli, ende buychde hem ter aerden, ende dede zijn hooft tusscen sijn knien

43

ende sprac tot sinen knape, gaet op ende siet ter zeewaert, hi ginc op, ende besach, ende sprac, daer en is niet, hi sprac, gaet weder henen seuenwerf,

44

ende in de seuenste reyse sprac hi, siet, daer gaet een cleyn wolc op wt die zee, als eens mans hant, Hi sprac gaet op ende segt Ahab, Spant aen ende vaert af, op dat v den reghen niet en ouerualle,

45

ende eermen toe sach, so wert den hemel swart van wolcken ende winde, ende daer quam eenen groten regen, Ahab voer ende troc te Iesreel,

46

ende die hant des HEREN quam ouer Elia, ende gorde sijn lendenen, ende liep voor Ahab henen, tot dat hi quam te Iesreel.