Den Bybel met groter neersticheyt ghecorrigeert (Liesveltbijbel 1542)

¶ Vanden strijt ende slach der Philistinen teghen Saul ende sine sonen.

Dat .xi. Capittel

1

⁺DIe Philisteen streden teghen Israhel, Ende die van Israhel vluchten voor die Philisteen, ende dye verslagene vielen opten berch Giboa.

+ A vers 1

2

Mer dye Philisteen hingen hen aen Saul, ende sinen sonen achter hem, ende sloegen Ionathan Abinadab, ende Malchisua, die sonen Saul.

3

Ende den strijt wert hart teghen Saul, ende die bogenschutters quamen aen hem, also dat hy vanden schutters ghewont wert.

4

Doe sprack Saul tot sinen wapendragher, trect wt v sweert, ende doorsteect my daer mede, op dat dese onbesnedene niet en comen, ende schandelic met my omme gaen. Mer sine wapendrager en wilde niet, want hy ontsachs hem seere. Doen nam Saul sijn sweert ende viel daer inne.

5

Doen sijn wapendragher sach dat Saul doot was, ⁺ viel hi ooc opt sweert ende sterf.

+ B vers 5

6

Also sterf Saul ende sijn drie sonen, ende zijn geheel huys te samen.

7

Doen die mannen Israel die inden gronde of broecke waren, sagen dat si gheulucht waren, ende dat Saul ende sine sonen doot waren, verlieten si haer steden ende vluchten Ende die Philisteen quamen ende woonden daer inne.

8

Des anderen daechs quamen die Philisteen, om die verslaghene wt te trecken, ende vonden Saul ende si-ne sonen liggen op den berch Giboa,

9

ende trocken hem wt, ende hieuen op sijn hooft, ende sijn wapenen, ende seyndent int lant der Philisteen alomme, ende lietent vercondighen voor haer afgoden, ende den volcke,

10

Ende stelden sine wapenen int huys haers gods, ende sine hooftscele vestichden si aen dat huys Dagon.

11

Doen alle die tot Iabes in Gilead hoorden, allet wat die Philisteen Saul gedaen hadden,

12

maecten hen alle strijtbaer mannen op, ende namen den lichaem Saul ende sijnder sonen, ende brachtense tot Iabes, ende begroeuen hare gebeenten onder dye eycke tot Iabes ende vasten seuen dagen.

13

Also sterf Saul in zijnder misdaet, die hi tegen den HERE misdaen hadde, aenden woorde des HEEREN dat hy niet en hielt, oock dat hy der waersegster vraechde,

14

ende en vraechde den HERE niet, daeromme doode hy hem, ende dat conincrijc keerde tot Dauid, den sone Isai.