Den Bybel met groter neersticheyt ghecorrigeert (Liesveltbijbel 1542)

Dauid wort een Coninck ghesalft, Ende van sinen stercken hooftlieden.

Dat .xij. Capittel

1

⁺ENde gheheel Israel vergaderde hem tot Dauid, tot Hebron, ende sprac, Siet, wi sijn v been ende vleesch,

+ A vers 1

2

Ooc te voren, doen Saul coninck was, leyde ghi Israel wt ende in, soo heeft dye HEERE v God v gesproken, Ghi sult mijn volc Israel weyden, ende ghi sult Vorste sijn ouer mijn volck Israhel,

3

Ende alle ouders Israel quamen ooc totten Coninck tot Hebron. Ende Dauid maecte een verbont met hen te Hebron voor den HERE, Ende si salfden Dauid tot eenen Coninck ouer Israel, na den woorde des HEREN, door Samuel.

Ende Dauid trock henen, ende alle Israel tot Ierusalem (dat is Iebus)

4

Want die Iebusiten woonden inden lande.

5

⁺Ende dye borgers tot Iebus spraken tot Dauid, Ghi en sult hier niet in comen. Mer Dauid wan den borchte Zion, dat is Dauids stadt.

+ B vers 5

6

Ende Dauid sprack, Wie dye Iebusiten eerst slaet, die sal een hooft ende ouerste sijn. Doen beclomse Ioab dye sone SeruIa eerst, ende werdt een hooftman,

7

Dauid woonde op die borchte, daer af heetmense Dauids stadt,

8

Ende hi timmerde die stadt rontomme, van Millo aen tot altemael rontomme. Ioab liet die ouerbleuene in die stadt leuen.

9

Ende Dauid voer voort, ende die HERE Zebaoth was met hem.

10

Dit sijn die ouersten onder den machtighen Dauid, die hen redelijc met hem hielden, ⁺ in sinen Conincrijcke by geheel Israel, datmen hem tot eenen coninck soude maken, na den woorde des HEREN ouer Israel,

+ C vers 10

11

Ende dit is dat getal der machtighen Dauids, Iasabeam die sone Aachmoni, dye principaelste onder den dertighen, Hi hief sijn spies op ende sloech drie hondert teender reyse.

12

¶ Nae hem was Eleazar dye sone Dodo, die Ahohite, ende hi was onder dye drie machtigen,

13

Dese was met Dauid doen si hem bescimpten, Ende die Philisteen hen daer vergadert hadden totten strijt Ende daer was een stuck ackers vol ghersten, Ende dat volc vluchte voor die Philisteen, ende sloegen die Philisteen,

14

Ende si terden midden optstuck, ende bescudden dat, ⁺ ende die HERE gaf groote salicheyt.

+ D vers 14

15

Ende die drie wt den dertighen principalen trocken af totten steene tot Dauid, in dat holle Adullam,

16

Mer der Philisteen legher lach inden valleyen Rephaim, Dauid was in dye borchte, Ende der Philisteen volc was op die tijt te Bethleem.

17

Ende Dauid wert lustigende ende sprac, Wie wil my te drincken gheuen vanden

[p. *]

water wt den putte te Bethleem, onder die poorte?

18

Doen braken die drie inder Philisteen leger, ende putten van dien watere wt den putte te Bethleem, onder die poorte, ende droeghent ende brachtent tot Dauid, Mer hi en wildes niet drincken, mer hi goot den HERE ende sprac,

19

Dat late God verre van mi sijn, dat ick dat doen soude, ende drincken dat bloet deser mannen in haers leuens pericule, Want si hebbent met pericule haers leuens hier ghebracht, Daeromme en wilde hijs nyet drincken, dat deden die drie alder stercste.

20

Abisai die broeder Ioab, die was die principaelste onder den drien, Ende hi hief sijn spies op, ende sloech drie hondert,

21

Ende hi was onder drien beroemt oft vermaert, ende hi die derde heerliker dan die twee, ende was haer ouerste, Mer tot aen die drie en quam hi niet.

22

⁺Benaia die sone Ioiada, des soons Ishail, van groten daden, van Kabzeel, Hy sloech twee leeuwen der Moabiten, Ende ghinc af, ende sloech eenen leeuwe midden inden putte, oft cuyle, inder tijt des sneeus,

+ E vers 22

23

Hy sloech oock eenen Egipschen man, dye was vijf ellen groot, ende hadde een spiese inder hant als eenen weefboom. Mer hi ghinc tot hem af, met eenen stock, ende nam hem die spiese wt der hant, ende doode hem met sijn eyghen spiese,

24

Dat dede Benaia die sone Ioiada, ende was vermaert onder die drie vromen,

25

ende was dye heerlicste onder dertich, Mer aen die drie en quam hi niet, Dauid maecte hem tot den heymeliken raet.

26

Die strijdtbaer ruesen sijn dese, Asael die broeder Ioab, ⁺ Elhanan zijns ooms soon, van sijns vaders siden van Bethleem,

+ F vers 26

27

Samoth die Harorite, Helez die Pelonite,

28

Ira die sone Ekes dye Thekoite, Abieser, dye Antothite,

29

Sebechai die Husaite, Ilai die Ahohite,

30

Maherai die Netophathite,

31

Heled die sone Baena die Netophathite, Iehai, die soon Ribai, van Gibeath der kinderen BenIamin, Benaia die Pirgatonite,

32

Hurai vander beken Gaas,

33

Abiel, die Arbathite, Asmaueth die Baherumite, Eliahba die Saalbonite,

34

die kinderen Hasem, des Gisoniters,

35

Ionathan die sone Sage, des Harariters,

36

Ahiam dye sone Sachar des Harariters, Eliphal, dye sone Vr,

37

Hepher dye Macherathite, Ahia die Pelonite, Hezro dye Carmelite, Naerai die sone Asbai,

38

Ioel die broeder Nathan, Mibehar die sone Hagri,

39

Zelech die Amonite Naherai die Berothite, ⁺ wapendragher Ioabs des soons ZeruIa,

+ G vers 39

40

Ira die Iethrite, Sared die Iethrite,

41

Vria die Hethite, Sabad dye sone Ahelai,

42

Adina die sone Sisa, die Rubenite een hooftman der Rubeniten, ende dertich waren onder hem,

43

Hanan die sone Maecha, Iosaphat die Mahonite,

44

Vsia die Asthrathite Sama ende Iaiel, die sone Hotham des Iroeriters,

45

Iediael, die sone Simri, Ioha sijn broeder die Thiziter

46

Eliel die Maheuiter, Ierebai ende Iosawia dye sone Elnaam, Iethma die Moabite,

47

Eliel Obed, Iaesiel, van Mizobaia.