Den Bybel met groter neersticheyt ghecorrigeert (Liesveltbijbel 1542)

Hoe dat hi beghint te tymmeren ende in wat ghedaente ende forme, dat wort hier bescreuen.

Dat .iij. Capittel.

1

⁺ENde Salomo begonste te timmeren dat huys des HEREN te Hierusalem opden berch Moria, die Dauiden sinen vader getoont was, den welcken Dauid bereyt had tot eender ruymte, op die plaetse Arnan des Iebusiten,

+ A vers 1

2

Hi begonst te tymmeren inder anderder maent, des anderen daechs, inden vierden iaer zijns conincrijcx,

3

ende aldus leyde Salomo dat fundament, om dat huys Gods te timmeren, Ten eersten die lengte, tsestich ellen, die wide twintich ellen,

4

ende dat poortael voor die wijde des huys henen, was .xx. ellen lanck, die hoochte hondert ende .xx. ellen, ende ouertroct binnen met louteren goude.

5

⁺Dat groot huys schutte hy met Dennen houte, ende ouertroet metten fijnsten goude, ende maecte daer op palmen, ende keten werck,

+ B vers 5

6

ende ouertrock dat huys met edele steenen, tot een vercieringe. Dat gout was Parwaim gout,

7

Ende ouertrock die balcken bouen aen ende die wanden ende die dueren met goude, ende liet Cherubim snijden op die wanden.

8

Hi maecte ooc dat huys des alderheylichsten, dies lengde was .xx. ellen, nae der wijden des huys, ende sine wijde was ooc .xx. ellen, ende ouertroct metten fijnsten goude by ses hondert ponden.

9

Ende gaf ooc tot nagelen vijftich sikelen gouts int gewichte, Ende ouertroc dye zael met goude.

10

⁺Hi maecte ooc int huys des alderheylichsten twee Cherubim, na beeltmakers const, ende ouertrocse met goude,

+ C vers 10

11

ende die lengde aenden vloghel, aen die Cherubim was .xx. ellen, also dat eenen vlogel .v. ellen hadde, ende raecte aen die wanden des huys, ende dat den anderen vlogel ooc vijf ellen hadde, ende raecte aenden vloghele des anderen Cherubs,

12

Also hadde den eenen vlogel des anderen Cherubs ooc vijf ellen, ende raecte aenden want des huys, ende sinen anderen vlogel ooc vijf ellen, ende hinc aenden vlogel des anderen Cherubs,

13

Also dat dese vlogelen der Cherubim, wt waren ghebreydet xx. ellen wijt, Ende si stonden op haer voeten, ende hare aensicht was ten huyswaert ghekeert.

14

Hi maecte ooc een voorhancsel van geelwerc, scaerlaken, rosijn root, ende lijnwaet, ende maecte Cherubim daer op.

15

⁺Ende hi maecte voor den huyse twee calomnen xxxv. ellen lanc, ende den knoop bouen daer op, vijf ellen

+ D vers 15

16

Ende hi maecte ketenwerck totten Choor, ende dedese bouen aen die calomne, ende maecte hondert granaet appelen, ende dedese aen dat ketenwerc,

17

ende hi rechtede die calomnen op, voor den tempel, een ter rechter siden, ende dander ter slincker siden. Ende die ter rechter siden was, die noemde hi Iachin, Ende dye ter slincker siden was, Boas.