Den Bybel met groter neersticheyt ghecorrigeert (Liesveltbijbel 1542)

Vanden vaten ende huysraet des Tempels.

Dat .iiij. Capittel

[p. *]

1

⁺HI maecte oock eenen metalenen outaer, twintich ellen lanc ende breet, ende thien ellen hooch,

+ A vers 1

2

Ende hi maecte een gegoten zee, thien ellen wijt, vanden eenen rant totten anderen rontomme, ende vijf ellen hooch, ende een mate van dertich ellen mocht omuaen.

3

Ende gelijckenisse van runderen was daer onder rontsom.

4

Ende daer waren twee rijghen, oft rijen knoppen om die zee, dat thien ellen wijt was, die mede aengegoten waren, Het stont alsoo op die twaelf runderen, Dat de drie gekeert waren ten noorden waert, drie westwaert, drie zuytwaerdt, ende drie oostwaert, ende die zee bouen op haer, ende alle haer achtersten waren inwaerts.

5

Sijn dicte was een hant breet, ende sinen rant was ghelijc als eens bekers rant ende een ontploken roose, Ende si nam, oft hielt drie duysent Bathen.

6

Ende hi maecte thien ketelen, dier sette hi vijf ter rechter siden, ⁺ ende vijf ter slincker siden, om daer inne te wasschen, al wat totten brandtoffer behoort, dat zijt daer in mochten stooten. Die zee, datter hen die priesters in souden wasschen.

+ B vers 6

7

Hi maecte ooc thien gouden candelaers, soo si behoorden te sine, ende hi steldese inden tempel, vijf ter rechter, ende vijf ter slincker hant.

8

Ende hi maecte thien tafelen, ende dedese inden tempel, vijf ter rechter, ende vijf ter slincker siden. Ende hi maecte hondert gulden scalen oft beckens,

9

Hi maecte eenen hof voor die priesters, ende eenen groten buycke, ende dueren inden buycke, ende ouertroc die dueren met latoen,

10

ende hi settede die zee opten rechten hoeck tegent oosten, totten zuytwaert,

11

Ende Huram maecte potten, ende schuppen, ende beckens.

⁺ Also voleynde Huram dat werck, dat hi den coninck Salomo dede, aen dat huys Gods,

+ C vers 11

12

te weten die twee calomnen metten buycken ende knopen bouen op beyde dye calomnen, beyde gewrongen verheuen werck om te bedecken beyde die buycken der knopen bouen op die calomnen,

13

ende die vier hondert granaet appelen, aen beyden gewrongen verheuen werck, twee rijgen granaet appelen aen elcken verheuen werck, om te bedecken beyde dye buycken der knoopen, die bouen op die calomnen waren

14

Ooc maecte hi die gestoelten, ende die ketelen op die gestoelten, ende een zee, ende twaelf runderen daer onder,

15

daer toe totten schuppen, crauwelen, ende alle haer vaten maecte Huram Abif, den coninck Salomo totten huyse des HEREN, wt louteren metael.

16

In dat landtscap der Iordanen lietse die coninc gieten, in cleyachtige aerde, tusscen Suchot ende Zaredatha,

17

ende Salomo die maecte aller deser vaten zeer vele, also dat des metaels gewichte niet te onderuinden en was.

18

Ende Salomo maecte alle tgereetscap toten huyse Gods, te weten, den gulden outaer, tafelen, ende toonbroot daer op,

19

⁺die candelaers met haren lampen van louteren goude, dat si voor den Choor souden bernen, alsoo dattet behoort,

+ D vers 19

20

ende die bloemen aen die lampen, ende die snutters waren gulden, dat was al geheel gout,

21

daer toe die messen, beckens, lepelen ende nappen waren louter gout, Ende den inganck ende sine dueren binnenwaerts totten alderheylichsten, ende die dueren aenden huyse des tempels waren gulden. Also wert alle werck volbracht, dat Salomo dede aenden huyse des HEREN.