Den Bybel met groter neersticheyt ghecorrigeert (Liesveltbijbel 1542)

Hier beghint dat boeck Nehemia.

¶ Nehemias is droeuich, ende hi beclaghet die gheuanckenisse des volcx.

Dat eerste Capittel

[afbeelding]

1

⁺DIt sijn die gheschiedenissen Nehemia, des soons Hagalia, Het gheschiede inder maendt Chislef, des twintichsten iaers, dat ic was tot Susan opt slodt,

+ A vers 1

2

quam Hanani een man van mijnen broederen met sommighen mannen wt Iuda, ende ic vraechde haer hoe het den Ioden ginghe, die behouden ende ouerbleuen waren vander gheuanghenissen, Ende hoe het te Ierusalem ghinc.

3

Ende si spraken tot mi, Die ouerghebleuene vander gheuangenissen sijn aldaer inden lande in grooten ongeluc ende smaet, ⁺ Die mueren Hierusalem sijn ghebroken, ⁺ ende hare poorten met viere verbernt

+ B vers 3

+ da. ix.a Neh. ix f

4

Doen ick sulcke woorden hoorde, sadt ick ende weende, ende droech rouwe twee dagen, ende vaste, ende badt voor den God des hemels, ende sprack.

5

Och HERE God vanden hemel, groote ende veruaerlijcke God, die daer houdt dat verbont ende ontfermherticheyt, den ghenen die hem beminnen ende sine gheboden houden,

6

Laet doch uwe ooren toe luysteren

[p. *]

ende uwe oogen open sijn, dat ghi dat gebet ws knechts hooret, dat ic nv voor v bidde, dach ende nacht, voor die kinderen Israhel v knechten, ende bekennen die sonden der kinderen Israhel die wi aen v gedaen hebben, Ende ic ende mijns vaders huys, hebben ooc gesondicht.

7

Wy zijn verleyt geworden, dat wi nyet gehouden en hebben die geboden, zeden ende rechten, dye ghi gheboden hebt uwen knechte Mose

8

⁺Mer gedenct toch des woorts, dat ghi uwen knecht Mose geboot ende spraect. Als ghi v ontgaet, so wil ic v onder die volcken stroeyen.

+ C vers 8

9

Mer ist dat ghi v bekeert tot my, ende houdet mine gheboden, ende doetse, ende al waert ghi verstooten tot aen dat eynde des hemels, so wil ic v nochtans van daer vergaderen, ende wil v brengen totter plaetsen die ic vercoren hebbe, dat mijnen naem aldaer soude woonen.

10

⁺Siet het sijn doch ymmer uwe knechten ende v volc, die ghi verlost hebt, door uwe grote crachte, ende machtige hant.

+ D vers 10

11

Och HERE laet uwe ooren aenmercken, dat ghebet dijns knechts, ende dat gebet uwer knechten, die daer begheren uwen naem te vreesen, ende laet uwen knecht heden gelucken ende gheeft hen ontfermherticheit voor dese mannen, Want ic was des conincx schencker.