Den Bybel met groter neersticheyt ghecorrigeert (Liesveltbijbel 1542)

¶ Een wtscrift oft Copie eens mandements des coninckx Artaxerxis, dwelck by den Ioden ter lieften Esther in alle sinen lande heeft laten wtgaen

Dat .xvi. Capittel.

1

⁺DIe groote Coninc Artaxerxes, dye van India aen regneert tot Ethiopia toe, ouer hondert ende seuenentwintich landen,

+ A vers 1

2

ontbiet den vorsten ende regenten der seluer landen, den ghenen die hem beminnen vriendelijcke groete

3

Daer sijn vele die om der menigerhande vrientschappen ende weldaden wille, als si tot grooter eeren gebrocht sijn, altijt meer ende meer dies te stouter ende hoochmoediger werden,

4

ende nyet alleene onse ondersaten bestaen hinderlijck te sijn (want oueruloedige weldaden en mogen si niet lijden,

5

ende beghinnen wat tegen die ghene te peysen die hen goet doen, ende en nemen niet alle dancbaerheyt vanden menschen

6

(mer in hoochmoet ende stoutheyt) als die gene die der weldaden onghedachtich ende ondancbaer sijn (ende si onderwinden hen Gods) Die alle dinc altijt siet, oordeelt dye welcke alle boosheit haet ende straft te ontulieden.

7

Het geschiet ooc dicwils dat vele der gheenre die vander ouermacht ghesedt zijn, ende dien die hanteringe ende saken der ondersaten beuolen sijn te handelen, stout werden, dat si met dat onnoosel bloet te storten haer beulecken, dwelcke haer in onuerhalijcke schaden brengt,

8

⁺Dye ooc met valscht ende bedrieghelijcke spraken, ende loghenachtighe clapperije die simpele goetheyt der ouersten verleyden ende verraden,

+ B vers 8

9

Nv ist orbaerlijc ende goet dat wi des waernemen, daer na vragen, ende dincken, niet alleene die oude gheschiedenissen die ons aengaende sijn, Mer ooc dat nv voor handen is, hoe schandelijcke oneerbare, ooc schadelike dingen die voochden ghehanteert hebben, ende daer en bouen in toecomende saken sulcx voorhoeden, op dat alle menschen het Rijcke rustich ende vreedsaem moghen maken, ende somtijden tot eene veranderinge mochten trecken, ende tghene dat nv teghenwoordich voor ooghen is, dat selue opt dalder vriendelijcste te ghemoete comen ende af te stellen.

10

Als nv Aman die sone Amadatha, van Macedonia (waerlic vreemt vanden Persischen bloede, ende verre van onser goedertierenheyt) by ons als een vreemdelinck inghenomen is,

11

ende dies vriendelijckeyt vercreghen heeft dye wi tot allen volcken ghebruycken (also dat hi onse vader ghenoemt ende van alle menschen in hoogher eeren ghehouden is gheweest, ghelijck

[p. *]

als die naeste ende vernaemste nae den coninck,

12

soo en heeft hi hem sijnder houeerdicheyt niet moghen onthouden, ende heeft ons bestaen niet alleen des Rijcx, mer oock des leuens te beroouen.

13

Ooc so heeft hi Mardocheum onsen salichmakere ende behouder, die ons in allen dinghen goet bewesen heeft, Desghelijcx oock die eerbare ende onscheldbare Hester, ⁺ een medeghenote ons rijcx, mitsgaders allen haren volcke met menigerley bedroch begeert te verdoen,

+ C vers 13

14

Want hi ghemeent heeft, In dien hi die selue wech dede, ende ons van dien beroofde, so soude hi in sulcker voege dat Rijcke der Persen tot die Macedoniers brengen.

15

Mer wi beuinden dat die Ioden die van desen schalc ouer ghegeuen waren om te dooden, datse gheene oeueldaders en sijn, maer datse betamelijcke ende rechte wetten ghebruycken, ooc dat si kinderen des alderhoochsten leuenden Gods sijn,

16

vanden welcken onse ende onser vooruaderen Rijcke tot noch toe wel gheordineert is,

17

Daeromme so sult ghi lieden wel doen als ghi die brieuen ende mandementen die van Amadatha sone wtgegaen sijn,

18

van gheender weerden en houdet, want die ghene die sulcx opgesedt ende beschict hadde, die hanget te Susis, voor der poorten, met alle sinen geslachte,

19

ende God (die alle dinck in sijnder ghewout heeft) die heeft hem na sijnder verdiensten sulcx vergouden ende betaelt.

20

Ende op sulcx sult ghi lieden die Copie van desen brieue in allen plaetsen publiceren, aflesen ende opslaen, ⁺ dat die Ioden vry ende onbehindert hen nae haerder insettinghen houden mogen,

+ D vers 20

21

Ende dat haer lieden geholpen werde, ende dat si aenden ghenen (die op die tijt haers ancxts ende noots haer oueruallen wouden) ghewroken werden opten derthiensten dach der twaelfster maent Adar,

22

Want God die alle dinc regeert, heeft dien dach, inden welcken dat wtuercoren volc soude ghedoot hebben, gheworden, tot vruechden ghekeert.

23

Ouermidts dien sult ghi lieden ooc onder dye hoochtijdelijcke daghen die ghi houdt, ⁺ desen dach met alderley genoechten begaen, op dat nv ende in toecomende tijden desen dach, den ghenen die de weluaert der Persen begeeren,

+ E vers 23

24

een ghedachtenisse si int beste, mer den ghenen dye ons moeylijck ende oproerich sijn, een ghedachtenisse des verderuens

Alle steden ende landen die sulcx niet en doen, dye sullen metten sweerde ende viere grouwelijcken verdaen ende verstooten werden,

25

ende niet alleen vanden menschen nemmermeer bewoont werden, mer ooc vanden wilden dieren ende voghelen sullen si ghehaet werden.

26

Na desen alle sprac Mardocheus, Van God den HERE sijn alle dese dinghen gheschiet, ⁺ want ic hebbe aengemerct den droome dyen ick ghesien hadde, die welcke die selue bediede, ende daer en is niet te vergheefs gheschiet,

+ F vers 26

27

Want die cleyne fonteyne is in een ryuiere ghewassen, in een licht ende eender sonnen verandert,

28

ende in groote wateren, dat selue beteekent Hester, welcke die coninck tot eender huysurouwen ghenomen heeft, ende woude dat die Coninghinne soude wesen,

29

Mer die twee draecken, dat ben ic ende Aman Ende die volcken die tsamen ghecomen sijn, dat sijn die ghene die opgestelt hadden der Ioden name wt te wisschen, ende te niet te brengen,

30

Ende mijn volc dat is Israel, die als si den HERE aengeroepen hebben, so heeft hijse behoet, ende verlost van alle quaet,

31

Ende heeft daeromme bewesen groote teekenen ende wonderheden onder die Heydenen. Ende hy heeft gewilt datter twee natien van volcke souden sijn,

32

Deene dat volc Gods, Ende dander der Heydenen, Ende beyde die natien sijn voor den HERE ghecomen, ende voor alle menschen ghelijck dattet van beghinne by hem voorsien was,

33

Ende also is die HEERE gedachtich geweest sijns volcx, ende heeft sinen erfdeele ontfermherticheyt bewesen, Ende daeromme sullen dese daghen ghelijc voorseyt is, met grooter eere ende feeste onderhouden worden inder maent Adar,

34

den veerthiensten ende vijfthiensten daghe der seluer maent met volcomen blijschappe ende ghenoechte.

35

Also dat alle Ioden te samen comen sullen ende Israel in allen haren stammen.

¶ Hier eyndet dat boeck Hester.