Den Bybel met groter neersticheyt ghecorrigeert (Liesveltbijbel 1542)

¶ Hi bewijst wat profijt dat wt der wijsheyt coemt.

Dat .ij. Capittel

1

⁺MIne kint wilt ghy mijne reden aennemen, ende mijn geboden bi v behouden,

+ A vers 1

2

dat uwe oore achtinghe hebbe op wijsheyt, soo moet ghi v herte neyghen totten verstande,

3

Want ist dat ghi dat verstant roepet ende crijschet daer na,

4

Ist dat ghi dat soect gelijc siluer ende ondersoect ghelijc die scatten,

5

als dan sult ghi die vreese des HEREN verstaen, ende Gods kennisse vinden.

6

Want die HEERE gheeft wijsheyt, ende wt sinen monde comt kennisse ende verstant,

7

⁺Hi latet den oprechten ghelucken, ende beschermet die vrome,

+ B vers 7

8

ende bewaert die paden des oordeels, ende bewaert den wech sijnder heyligen,

9

Dan sult ghi verstaen gherechticheyt ende oordeel, ende oprechticheyt, ende allen goeden wech.

10

⁺Ist dat die wijsheit v ter herten gaet, ende v siele lust heeft tot die kennisse,

+ C vers 10

11

so sal v voordachticheyt bewaren, ende verstant sal v behoeden,

12

dat ghy wtghetrocken wort vanden quaden wege, vanden ghenen die verkeerde dinghen spreken,

13

die daer verlaten die rechte bane, ende gaen duystere weghen,

14

Die hen verblijden quaet te doene, ende sijn vrolijc ouer dye verkeerde boosheyt,

15

Die welcke verkeert sijn op haren wech, ende op hare paden wederspannich.

16

Op dat ghi verlost wort vander vreemder, ende die niet uwe en is, die smeekende woorden gheeft,

17

ende verlaet den meester haerder ioncheyt, ⁺ ende verghetet dat verbont haers Gods,

+ D vers 17

18

want haer huys neyget hem totten doot, ende hare ganghen totten verlorene,

19

Alle die, die tot haer ingaen en comen nyet weder, ende en aengrijpen den wech des leuens niet.

20

Op dat ghi wandelt op goede wegen, ende bewaert die paden der gherechtiger,

21

want die oprechtige sullen ^a inden lande woonen,

a Inden lande wonen, is in tgeloue alle dinghen besitten in cristo ende vry sijn van conscientien in cristo.

22

ende die vrome sullen daer inne bliuen, Maer die godloose worden wt den lande gheroeyt, ende die verachters worden daer wtghenomen.