Den Bybel met groter neersticheyt ghecorrigeert (Liesveltbijbel 1542)

¶ Vermaent ons tot wijsheyt, Ende vertelt die manieren der vrouwen, Ende wat schaden dat dien ontmoeten, die der aenuechtingen des veeschs aenhanghen, ende die becoringhe consenteren.

¶ Dat .vij. Capittel.

1

⁺MIne kint, behout mine redene, ende verbercht mijne geboden bi v, houdt mijne gheboden, so sult ghi leuen, Ende mijn wet, ghelijc uwen oochappele,

+ A vers 1

2

Bindtse aen uwen vingeren,

3

scrijftse op dye tafel ws herten,

4

Segt totter wijsheyt, ghi sijt mijne suster, ende noemt die verstandicheyt uwe vriendinne,

5

op dat ghi bewaert wort voor dat vreemde wijf, voor een andere die soete woorden gheeft.

6

Want aent venster mijns huys keeck ic door die tralien,

7

ende sach onder die onwetende, ende wert geware onder die kinderen eenen sotten iongelinc,

8

die ghinck opter straten aen eenen hoecke, ende ghinc opten wech aen haren huyse

9

inder schemeringe aenden auont des daechs, doen het nacht werdt ende doncker was.

10

⁺Ende siet, daer gemoete hem een wijf in hoeren cieragie,

+ B vers 10

11

listich, wilt ende ongebonden, dat haer voeten in haren huyse niet geblijuen en consten,

12

nv is si buyten, nv op die straten, ende laget in allen hoecken,

13

Ende greep hem ende custede hem ombeschaemt, ende sprac tot hem,

14

Ic hebbe huyden dootoffere voor mi betaelt voor mijne gelofte,

15

Daeromme ben ic wtgegaen, om v te gemoeten om v aensicht vroech te soecken, ende hebbe v gheuonden,

16

Ick hebbe mijn bedde geciert met cieragie, met bonte tapisserie wt Egipten,

17

Ic hebbe mijnen leger met meyen, myrren, aloes, ende caneel verciert,

18

⁺Coemt laet ons der borsten sadt worden, tot aenden morghen, ende laet ons der liefden plegen,

+ C vers 18

19

Want die man en is niet thuys, hi is eenen verren wech ghetrocken,

20

Hi heeft den gheltsack met hem ghenomen, wie weet, wanneer hi thuys comt.

21

Si brachter hem toe met vele woorden, ende creech hem daer inne met haren smeekende lippen,

22

Hi volchde haer terstont na, gelijc eenen osch ter vleeschbanc geleyt wort, ende ghelijck totten boeyen daermen die sotten castijt,

23

⁺tot dat si hem metten pijle, die leuer splittet, gelijc eenen vogel totten stricke haest, ende en weet niet dat hem dat leuen geldet

+ D vers 23

24

So gehooret mi nv mijne kinderen, ende aenmerct die reden mijns monts.

25

En laet v herte niet varen op haren wech, ende en laet v niet verleyden op haerder banen,

26

Want si heefter vele ghewont ende neder gheworpen, ende alderley machtighe sijn van haer verworcht

27

Hare huysen sijn helsche wegen, daermen onderwaerts varet in des doots camere.