Den Bybel met groter neersticheyt ghecorrigeert (Liesveltbijbel 1542)

Die Propheet verwijt den volcke die duechden, die hy haer voor andere volcken gedaen heuet, Ende daer teghen haer ondancbaerheyt, ende onghehoorsaemheyt, ende thoont wat straffinghe den verachters aenstaende is

Dat .v. Capittel.

1

⁺NV wel aen, ⁺ Ick wil mijnen lieue een liedeken mijns ooms singhen, van sinen wijngaerde. Mijn lief hadde eenen wijngaert op een vette plaetse,

+ A vers 1

+ Iere. ij.

2

Ende hy hadde hem bethuynt ende bemuert, ende edele wijngaertrancken daer inne geplant, Hi tymmerde ooc eenen toren daer in, ende groef eenen wijnkelder oft wijnpersse daer inne, ende hy wachtede dat hi druyuen voortbrengen soude. Maer hi bracht wilde druyuen.

3

Nv oordeelt ghi borgers van Hierusalem, ende ghi mannen van Iuda tusscen mi ende mijnen wijngaert,

4

Wat salmen doch meer doen aen mijnen wijngaert, dat ic niet aen hem gedaen en hebbe? Waerom heeft hi dan wilde druyuen bracht? als ick wachte dat hy druyuen soude voortbrengen?

5

Nv wel aen, ic wil v thoonen wat ick mijnen wijngaert doen sal. Sine wanden sullen wech ghenomen worden, alsoo dat hi verwoest sal worden.

Ende sinen thuyn sal verschoort ende vertreden worden ⁺

+ Am. viij

6

Ick wil hem woest laten ligghen, dat hi noch ghecort noch ghemestet en worde. Mer datter dijstelen ende doornen opwassen. Ende ic sal den wolcken beuelen, dat si daer niet op en reghenen.

7

Den wijnghaert des HEREN Sebaoth, dat is thuys Israhel, ende dye mannen Iuda sijn lieflijcke planten. Hi wacht nae dat recht. Siet, so ist onrecht ende schenderie. Na gherechticheyt, siet, soo ist claghe ende iammer.

8

⁺Wee den ghenen die deen huys aen dander trecken, ende den eenen acker aenden anderen brenghen, tot datter gheen plaetse meer en is, also dat si dat landt alleen besitten.

+ B vers 8

9

Het is voor den ooren des HEREN Sebaoth. Wat sout ghi segghen? Oft niedt alle dye huysen woest en sullen worden? ende oock die grootste ende fijnste sonder inwoonders.

10

Want thien ackers wijngaerts, en sullen maer slechts eenen pot wijns gheuen. Ende een mouder saets mer een schepel gheuen

11

Wee den ghenen die smorghens vroech op sijn om haer tot dat suypen te stellen, ende sitten tot inder nacht toe, tot dat haer den wijn verhittet.

12

Ende hebben herpen, luyten, trommen, pijpen, ende wijn in hare bras-serien, ende sien op dat werc des HEEREN niet, noch en aenmercken niet op dat gheschapene sijnder handen.

13

Daeromme sal mijn volc wech gheuoert worden onuersiens, ende haer heerlike sullen hongher, ende haer ghemeyn volc dorst lijden.

14

Daeromme heeft dye ^a helle haer kele wijt op ghesperret, ende heeft de caken bouen maten op geloken, op dat also daer inne varen, beyde haer heerlicke ende tghemeyn volc, beyde hare rijcken, ende vrolijcken,

a Helle haer kaken. etc. Hier doir soe geeft die propheet te kennen die grootheyt der tribulatien die ouer die kinderen Israel viel ende quam, om harder afgoderien wille

15

soo dat een yegelijc hem buyghen moet, ende een yeghelijc vernedert, ende die ooghen der hooueerdighen verootmoedicht worden.

16

Maer dat die HERE Sebaoth verhoocht worde inden rechte. Ende God die heylige geheylicht worde inder gherechticheyt.

17

Dan sullen die lammeren haer voeden, ende weyden op hare plaetse, Ende die vreemdelingen sullen haer gheneren inder woestijnen der vetten.

18

Wee den ghenen, die aen donrecht trecken met stricken der ydelheyt, ende aen die sonde met wagen zeelen, ende seggen.

19

Laet sijn werc haest ende gheringe comen, op dat wijt sien. Laet hier comen den aenslach des Heyligen in Israel, op dat wijt weten moghen.

20

Wee den ghenen, die dat quaet goet, ende dat goet quaet heeten. Die wt duysternisse licht, ende van tlicht duysternissen maken. Die wt suer, soete, ende vant tsoete, suer maken

21

Wee den ghenen dye bi haer seluen wijs sijn, ende houden haer seluen voor verstandich.

22

Wee den ghenen, die Ruesen sijn om wijn te suypen? Ende dat crijschmannen int bier sijn.

23

Die den godloosen recht gheuen, om der ghauen wille, Ende dye dat recht der gerechter vanden seluen afkeeren

24

⁺Daeromme, ghelijc als die vlamme des viers het stroo verteert, ende die ydele stoppelen wech neemt, Also sal haer wortele veruuylen, ende haer ydelheydt op varen als stof ende puluer. Want si verachten dat ghesedt des HEEREN Zebaoth, ende versmaden dat woort des heyligen in Israhel.

+ C vers 24

25

Daeromme is den thoorne des HEREN vergramt op sijn volck, ende streckt sijn hant ouer haer, ende slaetse, dat die berghen beuen. Ende haer lichamen ligghen als slijck opter straten, Ende na dien alle en laet sinen thoorne niet af, maer sijn hant is noch wtghestreckt

26

⁺Want hi sal een banier voort laten comen verre onder die Heydenen, ende die selue locken vanden eynde der aerden, Ende siet, haestelic ende snel sullen si daer comen,

+ D vers 26

27

ende daer en is geen onder haer moede oft swack ende gheene die sluymert oft slaept, ende gheenen van haer en wort den gordel ontdaen van sinen ^b lendenen, noch die schoenriemen gelost.

b By dye lendenen ghegort te hebben wort verstaen sterckte ende redelicheyt, ende sonderlinge inden gheloue

28

Haer pilen sijn geslepen, ende alle haer boghen ghespannen. Die clauwen haerder peerden sijn gelijc als keystenen, ende haer waghenraders als een wintstorme.

29

Si brullen als leeuwen ende crijsschen als der leeuwen welpen

30

Sy sullen grimmen oft morren, ende den roof grijpen, ende wech dragen, also datter nyemant en sal af verlost worden. Si sullen in dier tijt ouer haer ruyschen als die zee ruysschet. Alsmen dan dat landt aensien sal. Siet, soo salt duysternisse sijn ende anxt, Want dat licht oock duysternisse sijn sal in sinen wolcken