Den Bybel met groter neersticheyt ghecorrigeert (Liesveltbijbel 1542)

Eenen lofsanck des propheten Iesaia tot God met eender Prophetie van die roepinge der Heydenen, Ende van die wtroeynghe Moabs

Dat .xxv. Crpittel

1

⁺O HERE du bist mijn God, v prijse ick Ic loue dijnen name, Want du doetste wonderlijcke dingen, dijne voornemen van outst herwaerts sijn ghetrou, ende warachtich,

+ A vers 1

2

Want du maecste die stat tot steenhoopen, die vaste hoofstat dat si op eenen hoope leget. Die palleysen der vreemder doetstu wter stat dat si nemmermeer getimmert en worden

3

Daeromme eeret v dat machtich volc, die steden der geweldiger heydenen vreesen v,

4

Want du bist een sterckte der armen, der simpelder een stercte inder tribulatie Een toeulucht voor den onweder, een schaduwe voor die hitte, Wanneer die tyrannen rasen, als een onweder teghen eenen want.

5

Du verootmoedichste der godlosen tempeesten, gelijc als een hitte inder wostinen, also dat die hitte den wijngaertrancken der tyrannen verdorret, met die scaduwe der wolcken

6

⁺Ende die HERE der heyrscaren sal op desen berghe allen volcken bereyden eenen heerlijcken maeltijt, een maeltijt van vette wel bemarchde dieren van gesuyuerde wtgedroesemde dingen,

+ B vers 6

7

Ende hi sal op desen berghe den doec oft cleet wech doen, daer alle volckeren mede gestopt sijn, Ende dat decsel daer mede alle heydenen bedect sijn,

8

Want den doot sal gansselic verslont worden, Ende die HERE God sal die tranen van allen aensichten af wasschen, Ende hi sal wech nemen die versmaetheyt sijns volcx, in dat geheele aertrijc, want die HERE heuet geseyt

9

Tot dier tijt salmen seggen, Siet dat is onse God opten welcken wi wachten, ende hi sal ons helpen, Dat is die HERE, wi wachten op hem, op dat wi ons verblijden, ende vrolic sijn, in sijn behoudinge,

10

want dye hant des HEEREN rust op desen berch, Maer Moab sal onder hem gedorsscet oft vertreden worden, gelijc dat stroo gedorsschet oft inden mist ende inden drec vertreden wordt,

11

Ende hi sal die handen wtstrecken midden onder haer, ghelijc als een swemmer die wt strect om te swemmen. Ende hi sal haren hoochmoet vernederen, metter cracht sijnder handen,

12

Ende die hoge vesten haerder mueren buyghen, vernederen ende inden stof neder werpen.