Den Bybel met groter neersticheyt ghecorrigeert (Liesveltbijbel 1542)

Hi vermaent allen die Gods woort beminnen dat si haer bereet maken met vruechde die genade Gods te bekennen, mer so wat hier van Hierusalem ende andere lichamelijcke dinghen verhaelt wort, dat wort door een hooger verstandt van die roepinghe der heydenen verstaen.

Dat .lx. Capittel

1

⁺STaet op Hierusalem, weest blinckende Want dijn licht coemt, ende dye heerlicheyt des HEREN gaet op ouer v,

+ A vers 1

2

Want siet, wanneer die duysternisse dat aertrijc bedect, ende die donckerheit die wolcken, so sal die HERE ouer v lichten, ende sijn heerlijcheyt sal ouer v schijnen,

3

ende die heydenen sullen in dijnen lichte wandelen, ende die volcken in die claerheit die ouer v opgaet.

4

Heft op v oogen ende siet rontomme, dese alle versamen haer, ende comen tot v. Dine sonen sullen van verre comen ende dijne dochteren sullen van alle siden tot v comen.

5

Dan sult ghi dinen wellust sien, ende wtbreken, ende v herte sal hem verwonderen ende ^a wtbreeden, als dye menichte des meyrs tot uwaerts trect, ende de macht der heydenen tot v coemt.

a Therte wtbreyden dat is verwonderen ende verblijden, alst quaet voorbi is, ende dat goet gecomen is. ij.co. vi c ps. iiij.a

6

Die menichte der Kemelen sal v bedecken, die loopers (oft Dromedarien) wt Midian ende Epha, si sullen wt Saba alle comen, gout ende wierooc brengen, ende des HEREN lof vercondigen. *

7

Alle dat vee in Kedar sal tot v vergadert worden. Die rammen Nebaioth sullen dy dienen, si sullen op mijnen aengenamen outaer geoffert worden, want ic wil dat huys mijnder heerlicheyt vercieren.

8

Welc sijnse, die daer vliegen gelijc als dye ^b wolcken, ende gelijc die duuen tot haren vensteren vliegen.

b Door de wolcke ende duuen worden verstaen dye apostelen ende andere euangelisce predicanten. psalmo. lxvij.

9

Die eylanden verwachten op mi, ende die meyrscepen van lancx herwaerts, op dat si di van verre dijnen sonen toebrengen mochten tsamen met haer, gout ende siluer ter eeren den name des HEREN dijns Gods, ende den heyligen in Israel, die v heerlic gemaect heeft,

10

die vreemde sullen v mueren timmeren, ende haer coningen sullen v dienen Want in mijnen toorne slae ic v, ende alst mi belieft, soo ontferme ic di wederom,

11

ende v poorten sullen sonder onder laet open staen, ende noch dach noch nach toe gesloten worden, op dattet heyr der heydenen tot v gebracht ende hare coningen tot v gestiert worden,

12

want een yegelic volc oft conincrijc dat v niet dienen en wil, dat sal vergaen, ende metten sweerde verwoest worden,

13

Die heerlicheit ^c Libani sal aen v comen. Die Cipresboomen, Cederboomen, ende boschbomen (oft palmboomen, deen metten anderen, om te vercieren dye plaetse mijns heylichdoms Want ic wil die steden mijnder voeten heerlic maken,

c Door dese boomen verstaetmen die Princen ende ouersten die dat volck regeren.

14

Die v verdruct hebben die sullen neder gebuycht tot v comen, ende alle die v beschimpen, dye sullen v te voet vallen. Ende men sal v heeten de stat des HEREN, dat heylige Sion Israels,

15

want daerom dat ghi verlaten ende gehaet sijt geweest, datter ooc niemant door gereyst en heeft, daerom wil ick v tot een eewich playsant maken, ende tot een vruechde inder eewicheit,

16

Du sult dat

[p. *]

melc vanden heydenen suygen, ende die borsten der coningen sullen v voeden, op dat ghi weet dat ic die HERE ben v salichmaker, ende ic die machtige in Iacob ben dijn verlosser.

17

¶ Voor dat metalen wil ick gulden werc brengen, ende in die stede des ysers het silueren, voor dat houten metael, ende voor dat steenen yser. Ende ic wil maken dat dijne vorstheeren vrede leeren sullen ende dijne scouteden, (oft officieren) gherechticheyt prediken.

18

Men en sal geen violencie meer hooren in dijnen lande, noch ongeual, noch hertsen leet, binnen dijnen palen. Maer v mueren sullen salicheyt ende v poorten Gods lof heeten.

19

Die sonne en sal niet meer v dachlicht zijn, ende dat licht der manen en sal v niet meer lichten. Mer die HERE selfs sal v een eewich licht sijn, Ende v God sal dijn prijs zijn.

20

Dijn sonne en sal niet meer ondergaen, Noch dijn mane den schijn verliesen, want die HERE sal dijn eewich licht zijn, ende v truerige dagen sullen een eynde hebben,

21

Ende v volc sal enckel oprecht zijn, ende si sullen dat aertrijc eewelic besitten, als die gene die de bloeme van mijnder plantinge sijn, ende een werc mijnder handen, dies ic mi beroemen sal.

22

Wt den cleensten sullender dusent werden, ende wt den slechten een machtich volc Ic die HERE wil sulcx corts tot sijnder tijt bescicken