Den Bybel met groter neersticheyt ghecorrigeert (Liesveltbijbel 1542)

Dat officie van eenen prophete, dwelc principalic in Christo veruult is.

Dat .lxi. Capittel

1

⁺DIe geest des HEEREN Gods is bi mi. ⁺ Daerom heeft mi die HERE gesalft, ende heeft mi gesonden den armen te prediken, dat ic die gebroken gewonde herten verbinden soude, ende den geuangen die verlossinge soude vercondigen, ende den gebonden den kercker openen soude,

+ A vers 1

+ Luce. iiij.

2

ende te vercondigen een ^a aengenaem iaer des HEREN, ende eenen ^b dach der wraken ons gods,

a Aengenaem iaer, dat is den tijt der gratien vercondighende vergiffenisse der sonden door Cristum.

b Dach der wraken is den dach des oordeels. Hie. xlvi c

3

ende te troosten alle truerige, dat ic den bedructen tot Sion geuen soude voor dat stof een scoonte Ende dat cierlic gewaet voor eenen swaren geest, op dat si genoemt mogen worden bomen der gerechticheit, ende planten des HEREN, vanden welcken hi hem beroemen mach, si sullen die oude woestijnen bouwen, ende wat in voortiden verdestrueert is op brengen,

4

die verwoeste steden die van vele geslachten leech gelegen hebben, sullen si vernieuwen,

5

Die vreemde sullen staen, ende uwe vee weyden, ende die wtlandige sullen uwe ackerlieden ende wijngaerdeniers sijn

6

Mer ghi sult priesters des HEREN geheeten worden, ende men sal v dienaren ons Gods noemen. Ende ghi sult der heydenen haue genieten, ende in haer heerlijcheit sult ghi v beroemen.

7

Voor v versmaetheyt salder tweeuout comen, ende voor die scande sullen si vrolijc sijn op haren acker, want si sullen tweeuout besitten. Ende in haren lande sullen si die eewige vruechde hebben,

8

Want ic ben die HERE die dat recht lief heeft, ende dye der roouers brantoffer hate. Ende ick wil doen dat haer loon sal seker oft gewis sijn. Ende eenen eewigen bont wil ic met haer maken,

9

Ende men sal haer saet kennen onder die heydenen, ende haer nacomelingen onder dye volcken, Also dat wiese sien sal, die salse kennen, dat si een saet sijn geseegent vanden HERE.

10

Ic verblijde mi inden HERE, ende mijn siele is vrolic in mijnen God, Want hi sal mi aentrecken dat cleedt der ^c salicheit, ende metten mantel der gerechticheit bedecken. Gelijc als een bruydegom met zijn cieraet, ende als een priester in sijn pronckerie, ende ghelijc als een bruyt in haer frayheyt, so sal hi mi vercieren,

c Cleet der salicheyt, ende mantel der gerechticheyt, is dat dubbel cleedt der wtuercorender te weten, van binnen tgelooue ende van buiten de werken der caritaten, dwelc andersins genoemt wort dat bruyloft cleedt. mat. xxij b

11

Want gelijc dat aertrijc sijn vruchte brengt, ende den hof sijne saet voortbrengt, also sal die gherechticheit ende prijs opgaen voor alle heydenen wt den HERE der heyrscaren