Den Bybel met groter neersticheyt ghecorrigeert (Liesveltbijbel 1542)

Die Propheet en sal niet op houden te roepen, waerscouwen, ende vermanen, tot dattet licht der genaden op gaet in Sion.

Dat .lxij. Capittel.

1

⁺OM Sions wil en wil ic niet swijghen. Ende om Hierusalems wille, soo en wil ic niet ophouden, tot dat hare gerechticheyt opgaet gelijc als een claerheit ende dat hare salicheyt als een tortse barne

+ A vers 1

2

op dat die heydenen dijn gerechticheyt sien, ende alle coningen dijn heerlicheyt. Ende ghi sult met eenen nyeuwen name genoemt worden, den welcken des HEREN mont noemen sal.

3

Ende ghi sult een scoon croone inder hant des HEREN, ende eenen crans der eeren inder hant dijns Gods sijn.

4

Men en sal v niet meer die verlatene noch v lant niet meer dat woeste heeten, Mer men sal v mijnen lust aen haer oft mijn aengename heeten, ende v lant, het heeft eenen heere, oft een belofte, Want die HERE is v gonstich, ende dinen lande wort eenen man op geslagen (oft toegeseyt)

5

Want gelijc als een iongelinc een maecht te houwelic neemt, also sal God hem seluen dijne sonen te houwelic versekeren. Ende gelijc als hem een bruydegom verblijt van sijnder bruyt, also sal hem v God van v verblijden.

6

⁺O Hierusalem ic wil wachters op dijne mueren bestellen, ⁺ die den gansschen dach ende den gansschen nacht niet stille swijgen en sullen, mer des HEREN sullen gedencken,

+ B vers 6

+ Ephe. v.

7

op datter bi v geen swijgen en si, noch ghy van hem niet en swijcht, ter tijt toe, dat Ierusalem bereedet wort, ende geset tot eenen prijs opter aerden.

8

Die HERE heeft bi sijnder rechter hant gesworen ende bi sinen stercken arme, Ic en wil voortaen niet meer dijn coren dinen vianden te eten geuen, noch ooc dinen most, dien ghi bearbeyt hebt, den vreemden niet laten drincken

9

Mer diet ingeuoert hebben, die sullen ooc eten, ende den HERE louen. Ende dien ingebrocht hebben, die sullen hem drincken inden voorhoue mijns heylichdoms

10

⁺Gaet henen ende wijct, door der poorten bereedet den volcke den wech, maect die straten, maect die banen, ruymt die steenen wt den wege, steect op dat venlijn tegen die volcken,

+ C vers 10

11

siet, die HERE laet hem hooren tot aen die eynden der werelt. Segget der dochter Sion, siet dijn salicheyt coemt, siet hi brengt sinen schat met hem ende sinen loon is nv voor hem bereet.

12

Men salse noemen dat heylich volc die verloste des HEREN, Ende men sal v heeten, die besochte ende niet die verlatene stadt.