Den Bybel met groter neersticheyt ghecorrigeert (Liesveltbijbel 1542)

Die propheet vermaent dat volc dat si den toecomenden salichmaker aen nemen souden ende dancbaer sijn.

Dat .lxiij. Capittel.

1

⁺WIe is dye? die daer van Edom coemt? met geuerwede cleederen van Bosra? die soo costelic ghecleet is, ende dye met al sijnder cracht daer henen swenst? Ick bent (sal hi seggen, die gerechticheyt leert, ende ic ben een vorste om te helpen

+ A vers 1

2

(dan salmen seggen) waerom is dan dijn cleet so root? ende dijn gewaet gelijc als den ghenen die inder wijnperssen tredet?

3

Ick hebbe (sal hi antwoorden, die wijnpersse alleen getreden ende daer en was onder allen den volcken een man niet bi mi, Ic hebbe (mijn vianden) in mijn ^a toornicheit geperst, ende in mijn gramscap vertreden, Daer af heeft haer bloet mijn cleeder besprengt, ende hebbe also alle mijn ghewaet vuyl gemaect.

a Toornicheyt, ende gramschap beteekent hier cristus vryheydt cracht ende moet, waer door hy verwonnen heeft, sonde, duuel, helle wereldt, ende doot.

4

Want ick hebbe eenen dach der wraken voor mi genomen, ende dat iaer die mijne te verlossen dat is gecomen,

5

Want ic sach rontomme mi, ende daer en was niemant die mi holpe, ende ic was veruaert ende niemant en onderhielt mi. Mer mijn rechter hant most mi helpen, ende mijn gherechticheyt onderhielt mi.

6

Daerom heb ic die volcken vertreden, in mijnder gram-

[p. *]

scap, ende hebse vocht ghemaect in mijnen thoorne, ende ic heb hare victorie ter aerden neder ghestooten.