Den Bybel met groter neersticheyt ghecorrigeert (Liesveltbijbel 1542)

¶ Als die propheet vertelt heeft het gewelt, ende dye weldaden des salichmakers, so seydt hi God den HEERE lof ende danck Ende met grooter suchtinge ende heeter aendacht roept hi die toecoemst ons verlossers.

Dat .lxiiij. Capittel.

1

⁺ICk wil dye goedertierenheyt des HEREN ghedencken, ende des lofs des HEREN in alle dat ons dye HERE ghesconcken heeft, ende der grooter weldaden aenden huyse Israels, dye hy haer gedaen heeft door zijn bermherticheyt ende grote goetheyt.

+ A vers 1

2

Want hi sprac, ⁺ si zijn ymmer mijn volc, kinderen dye niet valsche en zijn, ende daeromme was hi hare salichmaker.

+ ex. xiiij.

3

So wie haer benaude, die benaude hem oock. Ende dye engel dye voor hen is, die halp haer. Hy verlostese daeromme, dat hise lief hadde, ende haer spaerde. Hy namse op, ende droechse altijt van outs her.

4

Mer si vertoornden ende verstoorden sinen heyligen geest, Daerom werdt hi haer viant, ende street tegen haer.

5

Ende hi gedacht opten voorledenen tijt, op Moysen dye onder zijn volc was. Waer is dan nv diese wt den meyr leyde? metten herders zijnder cudde?

6

Waer is hy dye sinen heyligen gheest onder haer ghaf? Dye Mosen byder rechter hant leyde, door sinen heerliken arm? Dye dye wateren voor haer deelde, op dat hy hem eenen eewigen naem soude maken.

7

⁺Dyese in dye diepte voerde, ghelijck een peert int wilde gheuoert wordt, ende niet en struyckelden,

+ B vers 7

8

ghelijc een dier dat int velt henen gaet, dwelcke den gheest (oft adem) des HEREN drijft. Also hebt ghi ooc v volc gheleyt, op dat ghi v eenen heerliken name sout maken.

9

Daeromme siet nv vanden hemel af, ende besiet dye wooninghe dijns heylichdoms ende dijnder heerlicheydt. Waer is nv dijne zeloersche ernstighe liefde? dijne macht? dat dijne groote heerlijcke bermherticheyt haer dus hart tegen mi hout?

10

Ghi zijt doch onse vader, wandt Abraham en kent ons nyet, ende Israel en weet van ons nyet Mer ghy zijt onse vader ende verlosser, van outs her is dijnen name.

11

O HERE waerom laet ghi ons dolen van dijnen wege? ende ons herte verharden, also dat wi v niet en ontsien? Wordt doch wederom met ons eens, om dijnre dyenaers wille, die wt den geslachte dijns erfdeels zijn.

12

⁺Si besitten schier gansch ende al dijn heylich volc, Dijne vianden vertreden dijn heylichdom.

+ C vers 12

13

Wi zijn gelijc als voormaels, doen ghi ouer ons nyet en regneerde, ende recht oft wi na dijnen name niet genoemt en waren.

14

Och oft ghi den hemel schoorde, ende voert daer af, Ia dat die bergen om dijnre teghenwoordicheit smelteden ghelijc als een heet water, vanden crachtigen viere versiedt.

15

Op dat dijnen name onder dijne vianden bekent worde, Ende dat die heydenen voor v beuen moeten.

16

Door die wonderlike wercken dye ghy doet, daermen niedt op en vermoet, doen ghi daer afdaelde, ende als die berghen versmelteden.

17

Wanttet van aen beghinne der werelt niet ghehoort en is, noch metten ooren vernomen noch ooc gheen ooge gesien en heeft, wtghenomen v, O God alleen wat ghi den genen doet, die op v betrouwen. Ghi helpt den ghenen die met vruechden recht doet, ende dye dijnre weghen ghedachtich zijn.

18

Syet hoe wel ghi verthoornt waerste, doen wy sondichden, ende oock langhe daer in bleuen, maer ons wert nochtans geholpen.

19

Mer nv zijn wy alle gader ghelijck onreyne, ende alle onse gherechticheden zijn gelijc eender maensiecker vrouwen cleet. Wi zijn alle verwelct ghelijc dye bladeren, ende onse sonden nemen ons wech, ghelijck als dye wint.

20

Daer en is niemant dye dijne ^a name aenroept noch hem schict dat hi v vercrijghen mochte Daerom verberchstu dijn aensicht voor ons, ende laet ons in onse sonden versmachten.

a Den naem Godes nyet aenroepen Dat is niet achten op gode, ende ooc nyet van hem begeren, ende in sonden leuen, ende op hem seluen ende sine eygen wercken staen. Psalm. xiiij.b. ende lxxviij.b

21

Maer nv O HERE du bist onse vader, Wi zijn leem, ende du bist die potbacker ende wy alle zijn dwerck uwer handen.

22

O HEERE en wilt doch nyedt te seer toornich wesen, Noch en gedenct der sonden niet eewelicken. Siet doch dat aen, dat wy alle v volc zijn.

23

Die steden ws heylichdoms ligghen woest, Zyon is woest geworden, ende Ierusalem is een woestijne.

24

Dat huys onser heylicheyt ende heerlicheyt, waer in onse vaders v gelooft hebben, dat is metten vier verbrant. Ende al wat wy schoons hadden, dat is te schande ghemaect.

25

Wilt ghi O HERE bouen dat alle v nyedt laten verbidden maer swijgen, Ende ons bouen die mate castijen.