Den Bybel met groter neersticheyt ghecorrigeert (Liesveltbijbel 1542)

¶ Hieremias doet alle sine predikinghen in eenen boeck door Baruch schrijuen, op dat die Coninck ende die Vorsten die wt viantschap Hieremiam nyet hooren en wouden, ten minsten dye waerheyt souden hooren lesen. Die coninck verbernt dat boeck Ende daer wort een ander ghescreuen, ende den coninck sijn straffinghe vercondicht.

Dat .xxxvi. Capittel.

1

⁺INden vierden iare Ioakims des soons Iosie des conincx Iuda gheschiede dit woort tot Hieremiam vanden HERE, ende sprac.

+ A vers 1

2

Neemt eenen boeck, ende scrijft daer in alle die woorden, ⁺ die ic tot v ghesproken hebbe, ouer Israel, ouer Iuda, ende alle volckeren, van die tijt aen, dat ic tot v ghesproken hebbe. Te wetene, vander tijt Iosia aen, tot desen dach toe,

+ hie. xxv

3

Oft by auontueren dat huys Iuda, in dyen si hooren alle dat ongheluck dat ick haer dencke te doene, haer bekeeren wouden, een yegelijc van sinen boosen wesen, op dat ic haer hare misdaet ende sonden vergeuen mochte.

Doen riep Hieremias Baruch den sone Nerie,

4

⁺Die selue Baruch screef in een boeck wt den monde Hieremie alle die woorden des HEREN, die hy tot hem ghesproken hadde.

+ B vers 4

5

Ende Hieremias gheboot Baruch, ende sprac, Ic ben gheuanghen, dat ick in des HEREN huys niet gaen en mach,

6

Maer gaet ghy henen daer in, ende leest dit boec, waer in ghi des HEEREN woorden wt mijnen monde ghescreuen hebt, voor dat volc inden huyse des HEREN op eenen vasteldach, ende leeft voor den ooghen des gansschen Iuda, dye wt haren steden hier in comen,

7

oft sy misschien haer met ghebeden voor den HERE verootmoedighen wouden, ende haer bekeeren, een yegelijck van sinen boosen wesen, want den thoorne ende gramschap is groot, waer af die HERE teghen dit volck ghe-sproken heeft.

8

Ende Baruch dye sone Nerie dede also hem dye Propheet Hieremias beuolen hadde, dat hy die woorden des HEEREN wt den boecke las, inden huyse des HEREN.

9

Het ghebuerde inden vijfsten iare Ioakims des soons Iosie des Conincks Iuda, inder neghender maendt, datmen een vasten vercondichde voor den HERE, alle den volcke tot Hierusalem, ende alle den volcke dat wt den steden Iuda tot Ierusalem comt

10

Ende Baruch las wt den boecke dye woorden Hieremie inden huyse des HEEREN, inder capellen oft cameren Gamarie des soons Saphan des Cancelliers oft scrijuers, inden oppersten voorhof voor dye nieuwe poorte des huys des HEEREN, voor alle den volcke.

11

⁺Als nv Micheas die sone Gamarie des soons Saphan alle dye redenen des HEREN ghehoort hadde wt den boecke,

+ C vers 11

12

soo ghinck hy henen af int conincx huys in die scrijfcamer oft cancelrie, ende siet, daer saten alle die vorsten, Elisama die cancelier, Delaia die sone Semaia, Elnathan die sone Achbor, Gamarias die sone Saphan, ende Zedekias die sone Hananie met alle die vorsten.

13

Ende Michania thoonde haer alle die redenen die hi ghehoort hadde. Doen Baruch las wt den boecke voor den ooren des volcx.

14

Doen seynden alle die princen, Iehudi den sone Nethanie des soons Salamie, des soons Chusi tot Baruch, ende deden hem seggen. Neemt dat boeck, daer ghy voor den volcke wt ghelesen hebt met v, ende comt. Ende Baruch die sone Nerie nam dat boeck met hem ende quam tot haer,

15

ende si spraken tot hem, sidt neder, ende leest, dat wijt hooren. Ende Baruch last haer voor haren ooren.

16

Ende doen si alle die woorden hoorden, so waren si verslagen, deen tegen den anderen, Ende si spraken tot Baruch. Wy willen alle dese redenen den coninc te kennen gheuen.

17

Ende si vraechden den Baruch, Segt ons. Hoe hebt ghy doch alle dese redenen wt sinen monde ghescreuen?

18

Baruch sprac tot haer, Hi las my alle dese redenen wt sinen monde, Ende ick screef dye met inct inden boecke.

19

Doen seyden die vorsten tot Baruch, Gaet henen ende bercht v met Hieremia, dattet nyemant en wete waer dat ghi sijt.

20

Ende si ghinghen henen ten houe totten coninc, Ende si hielden dat boeck inder cameren Elisame des Canceliers, ende seyden den coninck alle dese redenen.

21

Doen seynde die coninc tot Iehudi, dat boec te halen. Dye selue namt wt der cameren Elisame des scrijuers.

22

Ende Iehudi last voor den coninck ende alle den vorsten, die byden coninck waren, ende dye coninc sadt int winterhuys (want het was inder negender maent) byden viere.

23

Als nv Iehudi drie oft vier bladeren ghelesen hadde, ⁺ soo snedet hi tboeck in stucken met eenen scrijfmesse, ende werpt int vier, dat onder die scouwe was, tot dattet boeck geheel verbernde inden viere.

+ D vers 23

24

Ende nyemant en versloech hem daer af, noch en verschoorde sine cleederen, noch die coninc noch sijn knechten, die nochtans alle dese redenen ghehoort hadden,

25

Hoe wel nochtans dat Elnathan, Dalias, ende Gamarias den coninck baden, dat hijt boeck niet en woude verbernen, Maer hy en verhoorde haer nyet.

26

Daer toe so gheboot die coninc Ierahmiel den sone Hamalech, ende Seraia den sone Asriel, ende Selamia den sone Abdeel, dat si souden Baruch den scrijuere, ende Hieremiam den propheet vanghen, Maer die HEERE hadse verborghen.

[p. *]

27

Doen gheschiede dat woordt des HEREN tot Hieremiam, na dien dat dye coninc dat boeck, ende dye redene, dye Baruch hadde ghescreuen wt den monde Hieremie, verbrandt hadde, ende sprac,

28

neemt een ander boeck wederomme, Ende schrijft alle die voorseyde woorden daer inne, dye inden eersten boecke stonden dwelcke Iehoiakim die coninck Iuda verbrant hadde.

29

Ende segt tot Iehoiakim den coninc Iuda, Alsoo spreect die HERE, Ghi hebt dit boec verbrandt, ende gheseydt, waerom hebtstu daer in ghescreuen? dat dye coninck tot Babel soude comen, ende dit lant verderuen, ende makent also, datter noch menschen noch beesten meer in sijn en sonden?

30

⁺Daerom spreect die HERE van Iehoiakim den coninck Iuda. Daer en sal niemant vanden sinen op den stoel Dauids sitten, Ende zijn doode lichaem sal wech geworpen worden, dattet des daechs inder hitte, ende des nachts inden vorste ligge.

+ D vers 30

31

Ende ick wil hem ende zijn zaet, ende sine knechten versoecken, om haerder misdaets wille, Ende ick wil ouer haer, ende ouer die borghers te Hierusalem, ende ouer die inwoonders Iuda laten comen alle dat ongeluck dat ic haer ghesproken hebbe, want si doch niet en hooren.

32

Doen nam Hieremias een ander boec, ende gaft Baruch den sone Nerie den scrijuer, Dye schreef daer in wt den monde Hieremie, alle die redenen, dye in dat boeck stonden, dat Iehoiakim die coninc Iuda hadde metten viere laten verbernen. Ende bouen dye selue redenen noch veel meer, dan der ander waren.