Den Bybel met groter neersticheyt ghecorrigeert (Liesveltbijbel 1542)

Si en gheloouen den woorde des Propheten niedt, Maer si trecken teghen Gods beuel in Egypten, Die Propheet voorseyt haer wat haer aldaer ontmoeten sal.

Dat .xliij. Capittel.

1

⁺DOen Hieremias alle die woorden des HEREN haers Gods wt hadde gesproken, tot alle den volcke, gelijc als hem die HERE haer Godt, alle dese woorden aen haer beuolen hadde,

+ A vers 1

2

soo sprac Asaria die sone Hosaia, ende Iohannan die soone Kareah, ende alle die wreede mannen, tot Hieremiam Ghi segt ons logenen, Dye HERE onse God en heeft v niet tot ons gesonden, noch gheseyt. Ghi en sult niet in Egypten reysen, om aldaer te woonen,

3

Maer Baruch die sone Nerie die stooct v tegen ons op dat wi den Chaldeen ouergegeuen werden, datse ons dooden, ende wech tot Babel voeren.

4

Also en waren Iohannan die sone Kareah, ende alle die hooftlieden metten gansschen volcke der stemmen des HEREN niet gehoorsaem, also dat si inden lande Iuda waren gebleuen,

5

Maer Iohannan die sone Kareah, ende alle die hooftlieden namen tot haer alle dye ouergebleuen wt Iuda, die van alle volcken, van daer si henen geuloden waren, wederom ghecomen waren, op datse inden lande Iuda souden woonen.

6

Te weten, mannen, wijuen, ende kinderen. Daer toe ooc des Conincx

[p. *]

dochteren, ende alle die sielen dye Nebusaradan, dye hooftman by Gedalian den sone Ahikam des soons Saphan ghelaten hadde, Oock den Prophete Hieremiam, ende Baruch den sone Nerie,

7

ende toghen in Egypten lant, Wandt si en wouden der stemmen des HEREN niet gehoorsaem sijn, Ende si quamen tot Taphnis.

8

Ende des HEREN woort gesciede tot Hieremiam tot Taphnis, ⁺ ende sprac,

+ B vers 8

9

neemt groote steenen in v hant, ende graefse inden tichelsteenen ouen, die voor der dueren is aenden huyse Pharao tot Taphnis, dattet die mannen wt Iuda aensien.

10

Ende segt tot haer. Also seyt die HERE der heyrscharen Israels God. Siet, ic wil henen seynden, ende laten halen mijnen knecht Nebucadnezar den coninc tot Babel, ende ic wil sinen stoel bouen op dese steenen setten, die ic hier gegrauen hebbe, Ende hi sal sine tente daer ouer spannen,

11

Ende hi sal comen ende Egypten landt slaen, ende dootslaen so wie hi raket, Ende geuanghen voeren soo wye hy crijcht, ende met den sweerde slaen, so wien hi treft.

12

Ende ic wil die huysen der afgoden in Egipten metten viere aensteken, Ia dat hise verbernen sal ende wech voeren, Ende hi sal ooc Egypten aentrecken, gelijc als een herder sijn cleet aentrect, ende hi sal nochtans met vrede van daer trecken.

13

Hi sal die beelt calomnen Beth Semes, dat is des Tempels der sonnen, in stucken breken, ende die kercken der Egypschen Godekens sal hi metten viere verbernen.