Den Bybel met groter neersticheyt ghecorrigeert (Liesveltbijbel 1542)

¶ Die propheet Hieremias sterckt sinen dienaer ende vrient Baruch, die in alsulcken benautheyt ende iammer een weenich verflauwet was

Dat .xlv. Capittel.

1

⁺DIt is dwoort, dat die Propheet Hieremias sprac tot Baruch den sone Nerie doen hi dese woorden in eenen boecke screef wt den monde Hieremie, inden vierden iare Ioakims des soons Iosie des conincx Iuda,

+ A vers 1

2

ende sprac Also spreect die HERE der heyrscharen Israels God, tot v Baruch.

3

Ghi spreeckt wee mijnder, Och hoe heeft my dye HERE tot mijnder moeyte ooc lijden gegeuen, Ic suchte mi moede, En sal ic gheen ruste vinden?

4

Segt (ghi Hieremia) hem also. Die HERE spreect alsoo. Siet, so wat ick ghesticht hebbe, dat breke ic weder af, Ende so wat ic geplant hebbe, dat roeye ic weder wt, ⁺ Ia dit ganssche mijn eyghen lant.

+ B vers 4

5

En begheert ghi noch hooge oft groote dinghen? En begheeres oft verhopes niet. Want siet, ic wil een iammer laten comen op allen vleessche, spreect die HERE, Mer dijn leuen wil ic v tot eenen buetpenninc schencken tot wat plaetse dat ghi ooc trecket.